Jeff Bezos Amazon CEO don become first person to worth more dan $200 billion for di world

Jeff Bezos wey be di richest pesin alive don break anoda record.

Bezos don become di first pesin for dis modern history to make over $200 billion, according to di latest Forbes estimates of im net worth.

Bezos, don wealthy pass e be before. Early Wednesday im cross anoda milestone as Amazon stock rise up by 2% as of Wednesday afternoon, according to Forbes, Bezos' net worth don go up by $4.9 billion, dis wan don make di 56-year-old di world first-ever persin to make $200 billion fortune.

As of Wednesday, 26 August 2020, di Amazon founder and CEO worth $204.6 billion—nearly $90 billion more dan di world second-richest person, Bill Gates, wey currently worth $116.1 billion.

How Bezos worth take go up?

Di coronavirus pandemic don help Amazon stock to go up by nearly 80% since di beginning of di year, and Bezos' net worth, wey be roughly $115 billion on January 1, don rise too. Bezos roughly 11% stake for Amazon maks up more dan 90% of im fortune. Na im get di Washington Post, aerospace company Blue Origin and oda private investments.

But despite all dis, Bezos for even rich pass e be so if no be say e pass through di most expensive divorce settlement in history last year. He break up from im ex-wife, MacKenzie Scott, last July, but agree to give her 25% of im Amazon stake.