UFC259 [Who won between Israel and Jan?]: Jan Blachowicz beat "Israel Adesanya" for latest UFC fight

Light heavyweight title-holder, Jan Blachowicz (28-7) don beat undefeated middleweight Israel Adesanya(20-1) to remain as di light heavyweight champion for di UFC 259 for Las Vegas.

Jan Blachowicz of Poland win Israel Adesanya afta judges hand over di scores of 49-46, 49-45 and 49-45 in favor of di Polish champion.

Dis go be Isreal first career loss. Afta di game, di Nigeria-born New Zealand-based Mixed Martial Artist say di game no go as im expect but e dey okay.

Since Jan Blachowicz start im UFC run with a 2-4 record, di Polish Mixed Martial Artist don win nine of im last 10 fights, e come become undisputed UFC light heavyweight champion.

Na Blachowicz give Israel Adesanya im first defeat.

How Israel Adesanya lose to Jan Blachowicz

Di dream of Nigeria-born New Zealand-based Mixed Martial Artist to become two division champion don scata as Jan Blachowicz beat am to retain di light heavyweight champion title for di UFC 259 for di UFC Apex for Las Vegas.

Blachowicz for di first two rounds bin dey take am easy wit Adesanya but for di final two rounds, e turn di table as e score 49-45, 49-45 and 49-46 for di judges to declare am winner.

Adesanya bin start di fight on high note as e pounce on im opponent for di first and second round but for di 4th and final rounds, di Polish take control of di fight as e take down Adesanya.

Blachowicz end di fight in full mount as e rain down punches on Adesanya, wey neva lose before for im mixed martial arts career wey start for 2012.

Israel Adesanya lose, wetin e mean for im career?

Adesanya, di energetic Nigerian-born New Zealander, don fail to join Amanda Nunes, Conor McGregor, Daniel Cormier and Henry Cejudo as UFC two-belt champions title holders.

Adesanya na di sharper, more aggressive striker for di early rounds, but Blachowicz survive di attack for di beginning before e launch im game plan.

Blachowicz dey celebrate im latest victory for a fighter wey win im title last for September afta six years wey e don dey UFC and 13 years as a professional.

Just before dis fight im lose, Israel "Di Last Stylebender" Adesanya. say:

"For me na about di victories. Di names you collect, di scalps wey you take along di way. I wan be di guy wey take out everyone so that wen dem don tok finish dem go be like, 'na im be di greatest of all time.'

Di Nigeria-born New Zealand-based fighter bin dey tok ahead of e ogbonge fight against fearsome light heavyweight champion Jan Blachowicz, 38, wey be di headline fight of UFC 259 on 6 March.