StopTheSoot: How trye fire throw Port Harcourt inside darkness
- Author, Karina Igonikon
- Role, BBC News Pidgin, Port Harcourt
Parts of Port-Harcourt southern Nigeria fit no see light for long time afta fire wey start Saturday night don scata power injection substation wey dey supply light to di town.
Na local pipo put di fire for moto tyre sake same dem wan comot copper wire wey dey inside di tyre, according to wetin BBC Pidgin find out.
Di fire come blow enta oda building including di power injection substation wey dey di area.
Fire service pipo from Shell and Nigeria Ports Authority including di ones wey from Rivers state goment try to quench di fire.
Soot mata, wey be black particles wey dey fly for air follow for palava wey dey worri pipo for Por-Harcourt.
Civil society groups bin don protest ontop dis mata for April, but dis time, na pipo dey cause air population for dem self.
John Onyi of Port-Harcourt Electricity Distribution Company (PHED) tok say; "We don shut down power supply sake say di fire dey try burn down our office and facilities".
Im tok say dem neva sure how many things di fire don spoil for dem office until dem do damage audit.
End of Di one wey oda users dey read well well
No pesin die so far so but light no come dey di whole area since di fire start.
