Liberia vs Nigeria highlights: Ahmed Musa, Victor Osimhen goals make Super Eagles shine

Super Eagles Ahmed Musa and Victor Osimhen goals make Nigeria shine over Liberia on Saturday.

After 45 minutes of action for first half, Nigeria 1- 0 Liberia na im be score card for Tangier Stadium, Morocco for dia 2022 World Cup qualifier match.

Victor Osimhen 14th minute penalty kick na im give Nigeria di first goal on 13 November, 2021.

Ahmed Musa 90th minute penalty kick towards di end of second half give di Super Eagles dia second goal to beat di Lone Stars.

At di end of di game Nigeria pocket anoda three points to continue di lead for Group C of di World Cup qualifiers across Africa.

Despite di win, some Nigerians knock di Super Eagles outing, describing dia performance as poor.

Liberia vs Nigeria: Super Eagles line up

Super Eagles head coach Gernot Rohr use di 3-5-2 formation for Saturday 2022 FIFA World Cup qualifier against the Lone Star of Liberia, according to football analysts.

See Super Eagles line up.

Nigeria gatz win or draw at home on Tuesday wen dem jam Cape Verde if dem go qualify for 2022 World Cup Qualifier playoffs in March.

Di Super Eagles currently get 12 points at di top of Group C standings wit five matches played so far.

While Cape Verde wey defeat Central African Republic 2 - 1 on Saturday dey at 10 points.

So both di Tubarões Azuis [Blue Sharks] and di Super Eagles go dey aim for a win.

Nigeria vs Cape Verde game go happun on 16 November, 2021 by 5pm for Lagos.

Liberia vs Nigeria Live stream: How to watch di match

Di Nigeria Football Federation live stream di match ontop dia Facebook page between 5pm to 7pm on Saturday as di Liberia vs Nigeria match dey happun.

"Go for victory over Liberia today," Na so Nigeria Sports Minister Sunday Dare charge Super Eagles on Saturday.

Lone Star of Liberia na im host Super Eagles inside Tangier, Morocco for dis all important .

Nigeria bin win di reverse fixture 2-0 in Lagos earlier dis year.

Youth and Sports Development Minister Sunday Dare ginger Super Eagles to go for di win against Liberia.

Dare beg dem ahead of di match to do Nigeria proud and brighten dia chances of qualifying for di final stage of di 2022 World Cup African qualifiers.

"The whole of Nigeria di whole Nigeria behind you," Dare open up for im statement to di team.

"I believe say di leadership of di Nigeria Football Federation(NFF) don work hard to provide di coaches, players and support staff with all you need to dey ahead of your opponents today.

"I know di entire team dey fired up for dis. So, go and do us proud. No take anything for granted." Di Minister add.

Di Sports Minister continue say; "Give your 100% on di pitch to get a win today and then we wrap things up in Lagos next Tuesday".