Dembele beat Lamine Yamal to win Ballon d'Or 2025

Paris St-Germain and France forward Ousmane Dembele don win di 2025 Ballon d'Or and emerge as di best player for di world.

Dembele beat closest rival Lamine Yamal to win di award for Paris France.

Former Brazil and Barcelona star Ronaldinho hand Dembele di trophy as im kiss di golden ball.

Ousmane Dembele for di 2024-25 win di Champions League, Ligue 1, French Cup, Uefa Super Cup, Trophée des Champions winner and now Ballon d'Or winner.

Spanish legend Aitana Bonmati win di Women Ballon d'Or wey be di Best Women Player of the Year award for a record third time back to back.

Di 27-year-old win am sake of her performance last season, she also make history as she become three-time Ballon d'Or winner.

She don add am to her oda titles wey be World Cup winner and three-time Champions League winner.

Lamine Yamal win di first award of di night - im win di men Kopa Trophy, for best-performing player for di world under di age of 21.

Last year na Manchester City and Spain midfielder Rodri win di award for di men while Barcelona and Spain midfielder Aitana Bonmatí win di women own.

Former Netherlands star Ruud Gullit host di ceremony wit presenter Kate Scott for di Theatre du Chatelet for Paris, France.

Full list of winners of di 2025 Ballon d'Or

Apart from di best men and women footballer of di year, oga pipo go also collect awards wey include:

Ballon d'Or - Aitana Bonmati win di best Wom

Kopa Trophy - Lamine Yamal win di men's Kopa Trophy, for best-performing player for di world under di age of 21.

Barcelona and Spanish midfielder Vicky Lopez win wey dey 19 years win di women category of di best under-21 player for di world.

Johan Cruyff Trophy - Paris St-Germain boss Luis Enrique win di Johan Cruyff Trophy for men while England boss Sarina Wiegman win di Johan Cruyff trophy for women. Dis na for di best male and female coach for di world.

Yashin Trophy - Manchester City goalkeeper Gianluigi Donnarumma win di men Yashin Trophy for im performance during last season wey Paris St Germain dey exceptional for di 2024-25 season.

England goalkeeper Hannah Hampton win di best women goalkeeper for di world.

Gerd Muller Trophy - Viktor Gyokeres wey be former Arsenal forward win di men award for di best striker for di world while Ewa Pajor of Barcelona win di women category.

Dis award na for di best male and female striker for di world based on di number of goals dem score for both dia club and national team (kontri).

Men's & women's Club of the Year Trophy - Paris St-Germain win di Men's Club of the Year Trophy sake of say dem win di Champions League, Ligue 1, French Cup and odas.

Arsenal win di women category as dem win di Women's Champions League.

Socrates Award - Xana Foundation win di Socrates Award, di Foundation dey dedicate diasef to dey provide comprehensive support for children and young pipo wey get sicknesses wey dey threaten dia life.

Na Paris St-Germain boss Luis Enrique lay di foundation following di death of im daughter Xana wey bin dey nine years old for 2019 afta she bin battle wit a rare form of bone cancer.

Dem also pay tribute to former Manchester United striker Denis Law di only Scottish player wey don win di Ballon d'Or - wey die for January.

Dem also show video tribute in memory of former Liverpool forward Diogo Jota, who die for July.

Past winners

Only three players oda dan Lionel Messi and Cristiano Ronaldo don win di Ballon d'Or since 2008.

Messi and Ronaldo win di award 14 times ova 16 years between 2008 and 2023.

Luka Modric end dia dominance wen im bin win di 2018 prize afta e guide Real Madrid to third successive Champions League title and Croatia to dia first World Cup final dat year.

Karim Benzema bin win am for 2022 while for 2024, Rodri, wey lose just one game during di 2023-24 season for club and kontri, become di first Spanish player to win di men award since 1960 and di first Premier League player to win di award since Ronaldo for 2008.

Rodri bin help Spain win Euro 2024 and also win di Premier League, Uefa Super Cup and Club World Cup wit Manchester City for 2023-24.

Rodri win di award ahead of Real Madrid and Brazil winger Vinicius Jr and im team-mate Jude Bellingham wey come third.

We go dey update di tori