Peter Obi, Atiku, Amaechi and odas show as coalition stamp ADC as chosen party to remove Tinubu

Ogbonge politicians from di opposition parties gada for di Shehu Centre for Abuja, Nigeria capital on Wednesday, 2 July to unveil di African Democratic Congress (ADC) as di chosen party for di coalition to face di ruling All Progressives Congress, APC for di 2027 election.

Di 2023 presidential candidate of di Peoples Democratic Party (PDP), Atiku Abubakar; im Labour Party (LP) counterpart, Peter Obi; one former Govnor of Kaduna State, Malam Nasir El-Rufai; former Rivers State Govnor, Rotimi Amaechi, plus oda ogbonge politicians dey for di unveiling announcement.

Oda politicians wey present for di coalition meeting include one former Nigeria Senate President David Mark and one former govnor of Osun State Rauf Aregbesola.

During di meeting, Ralph Nwosu, di founder and pioneer Chairman of di African Democratic Congress (ADC), officially handover di mantle of leadership give di former Senate President David Mark, as di interim National Chairman of di party while former Osun state Govnor Rauf Aregbesola go be di interim National Secretary.

Odas politicians wey dey di meeting na one former member of di National Assembly, Senator Dino Melaye; one former Minister of Youth and Sports; Solomon Dalong; Dele Momodu, Senator Gabriel Suswam; Senator Ireti Kingibe of di Labour Party (LP), one former Deputy Speaker of di House of Representatives, Emeka Ihedioha, Yusuf Baba-Ahmed, former APC National Chairman John Oyegun, Aminu Tambuwal, Uche Secondus, Labour Party Senator Tony Nwoye, and one former Chief of Air Staff, Air Marshal Sadique Abubakar (retd.) all dey in attendance

Several oda politicians from di PDP, Social Democratic Party (SDP), plus di LP also dey gada for di unveiling.

No be today tok-tok about a political joinbodi to comot di ruling All Progressives Congress (APC) from power start, but Tuesday meeting be like an official unveiling.

But who be members of dis joinbodi? And dem go fit achieve dia aim of making Bola Tinubu a one-term president of Nigeria?

Members of dis opposition joinbodi

David Mark: Na former Brigadier General for di Nigeria army bifor e retire and also former military govnor of Niger State from 1984 to 1986.

Mark bin represent Benue South Senatorial District for di Nigeria Senate for many years and e rise to di position of senate president for eight years: 2007 to 2015.

Dis Wednesday morning, oga Mark release statement say e don resign from di People Democratic Party (PDP) to join di opposition joinbodi group to make sure say dem "rescue our nation and preserve our hard-earned democracy".

Rauf Aregbesola: Ogbeni as many pipo dey call am na bifor-bifor ogbonge ally of President Tinubu, who bin appoint am as commissioner wen e be govnor of Lagos State.

Oga Aregbesola bin complete eight years as commissioner for Lagos under di den govnor Tinubu, bifor e run for govnor of Osun State wit Tinubu support and e win, do two terms.

But dia quarrel start wen Aregbesola bin quarrel wit im successor Adegboyega Oyetola, who bin also get di support of Tinubu.

Aregbesola na di secretary of dis joinbodi and e tok for im acceptance speech say di task ahead no be easy one, "e go take time. E go demand sacrifice. But we fit do am".

Atiku Abubakar: Incidentally, former vice president Atiku bin follow for di political joinbodi wey bring APC to power in 2015, now e don help form anoda one to comot dem.

Atiku na one of di major PDP members wey pull out dat time to form di New-PDP and later enta di APC just bifor di 2015 general election, but shortly afta dat election, e return to di PDP and na im be di party presidential candidate in 2019 and 2023.

In fact, di quarrel wey dey tear di PDP apart currently according to tori na sake of di gbas-gbos between pipo wey dey loyal to Atiku and di ones wey dey loyal to Nyesom Wike, former govnor of Rivers State wey dey serve for di Tinubu administration as a Minister.

Peter Obi: Di Labour Party, LP presidential candidate for di 2023 election, Peter Obi, dey for di ogbonge politicians from di opposition party wey attend di meeting on Wednesday.

Nasir El-Rufai: Anoda former Tinubu paddy wey later quarrel wit am. El-Rufai name bin follow for di pipo wey Tinubu bin appoint as ministers, but di senate no clear am.

E don since announce say e don resign from di APC to join di Social Democratic Party (SDP). E follow for di pipo wey carri dis opposition joinbodi matter for head.

Sule Lamido: Di former govnor of Jigawa State bin also serve as Minister of foreign affairs unda President Olusegun Obasanjo from 1999 to 2003.

E bin also contest di 2019 Presidential primary for di PDP but e lose to Atiku.

Aminu Tambuwal: serve as Speaker of di House of Representatives and also two terms as guvnor of Sokoto State. Tambuwal follow for di pipo wey join di APC from di PDP bifor di 2015 general elections, but e jump bak in 2018.

Babangida Aliyu: na two time govnor of Niger State and even though e follow for di govnors wey bin quarrel wit di PDP bifor di 2015 election, e remain for di party

Sam Egwu: Former govnor of Ebonyi State and also former Minister of Education.

Liyel Imoke: Serve two terms as govnor of Cross River State, afta e don work as minister of Power and Steel during di Obasanjo goment.

Oda popular names wey follow for dis joinbodi include: former PDP National Chairman Uche Secondus, PDP big oga Tom Ikimi, Senator Ben Obi, Senator Dino Melaye plus many odas.

Aregbe accept, Mark resign, Sowore say 'no'

Dis Wednesday morning David Mark resignation letter from di PDP go viral on social media, even though e bin write di letter since 27 June, 2025.

For di letter, Mark say e don dey loyal to PDP even afta many pipo leave di party wen dem lose di presidential election in 2015.

"However, recent evets...don redcue di party to a shadow of e former sef and am to public ridicule," Mark tok.

E say e consult im family, friends and political associates bifor e decide say time don reach to comot from PDP and join di National Coalition of Political Opposition Movement Nigeria.

For im own part, Aregbesola say e accept im appointment as di secretary of di joinbodi movement, and e go help to make am a party wia internal democracy dey in practice, no be only for mouth.

"As di National Secretary, I go work to build a party wey get clear ideological compass as a party wey go dey absolutely committed to di pipo, rooted in democratic values, rule of law, social justice, accountability, transparency and national development," e tok.

However, Omoyele Sowore, wey be rights activist and former presidential candidate of di Africa Action Congress (AAC), tok say e no go join di coalition bicos "I no fit join tif to fight tif".

Sowore accuse all di members of di coalition say dem follow contribute to how Nigeria be now and dem no fit claim say na dem go make Nigeria beta.

"I get only one allegiance: to di oppressed, di disenfranchised, di cheated, di silenced. I go only join di pipo wey dey ready and willing to end dis national nightmare created by dis characters."

I dey ready to serve only one term - Obi

All dis dey come afta Peter Obi say if e win di presidency for 2027, e no go mind to serve only one term, bicos e believe in di unwritten rotation of power betwin North and South.

Obi tok dis one during one conversation for X space last weekend, wia e say e believe in di zoning of leadership for di kontri.

"If you take di arrangement - wetin you fit call unwritten agreement - say power go go south and north and if we follow dat arrangement, you go see say anybodi, no be just me, wey happen to come from di south as president for 2027 must dey ready to comot on di 28 of May (not 29), 2031," e tok.

Dis coalition fit unseat di APC?

According to Prof Okechukwu Ikechukwu wey be ogbonge political sabi pesin, di work for di coalition dey very tough, but dem go first need to define dia trajectory, how dem wan do am, and who go be dia candidate.

"If dem do dis three tins, pipo go dey clear about dia narrative and decide weda to trust dem or not. No be to dey come on TV dey shout say we wan remove Tinubu, you don first convince di pipo sey di pesin you dey bring go dey beta?" oga Ikechukwu ask for one TV interview.

"E get one time for dis kontri wen pipo bin say 'anytin but Jonathan'...Buhari come on and evribodi dey shout say we dey hell, Buhari don go and Tinubu don come but we still dey shout."

Oga Ikechukwu say di coalition must to clear all di doubt for pipo mind "odawise dis go just be ordinary entertainment, wit all due respect to di pipo wey dey involve, and e go soon peter out".