Nigerian Army order investigation into alleged brutalisation of couple by soldiers

Di Acting Chief of Army Staff, Lt. General Olufemi Oluyede don order make dem investigate di alleged brutalisation of one Nigerian man and im fiancée afta argument between dem, one officer and two soldiers for Abuja.

Video of di alleged brutalisation bin go viral on social media, wey make Nigerians dey call on di Nigerian Army to bring di officer and soldiers to book.

Di Director of Army Public Relations, Major General Onyema Nwachukwu tok for one statement on Tuesday say Lt. General Oluyede don order investigation into di mata.

“The attention of di Nigerian Army (NA) don dey drawn to one viral audio-visual recording wey dey circulate on social media platforms, purportedly showing one senior Army officer and 2 oda soldiers for one quarrel wit a man and woman within di Abuja metropolis.

“Di circumstances wey lead to dis incident no dey clear at di moment.

“However, di Acting Chief of Army Staff, Lieutenant General Olufemi Oluyede, don order immediate investigation to unravel di true circumstances surrounding dis quarrel.

“Di NA remain committed to serve and protect all law-abiding Nigerians as e dey inside di Constitution of di Federal Republic of Nigeria.

“Therefore, we urge the public to dey rest assured say due diligence go dey applied to reach a logical conclusion on dis mata."

Meanwhile, di couple don write to di Nigerian Army to dismiss di officer and two soldiers wey allegedly brutalise dem, and dem also ask for 150 million naira compensation.

Wetin happun

Video show one man behind di wheel dey struggle wit some soldiers wey dey hit am, while one woman dey feem di incident.

For di video, di man identified as Vershima Mker ask di soldiers wey dey hit am, "How I take bash your car?”

Di couple wey dey plan dia wedding tok say di military officers subject dem to abuse, and subsequently detain dem for eight hours.

Wen di man comot for di car to wia di soldiers park dia SUV, dem land am slap for face, and wen dem see say di woman dey record di situation, one of di soldiers ask am to bring her phone.

Di officers begin struggle to collect di phone, and di footage eventually go black.

According to di couple lawyers, di incident happun wen dem bin dey drive on 3rd Avenue, Gwarinpa. Di officer wey be Major General bin dey drive behind dem wit convoy.

Di lawyers claim say dem handcuff dia clients and push dem into di boot of one of dia vehicles and take dem to police station, wia dem claim say dem detain di couple.

According to di lawyers, di Major General say make police no release dem until e tok so.

Di lawyers say dem release dia clients wen di officer come to di police station and allegedly compel dem to write apology under duress bifor dem allow dem to go.