Nigeria beat Ghana for corruption as island nation maintain status as least corrupt African kontri - CPI report

Corruption Perception Index for 2024 wey Transparency International release on Tuesday 11 February show Nigeria as one of di most corrupt kontris for di world.

For di report, Nigeria score 26 out of 100 points and rank 140 out of 180.

Dis latest report show say Ghana score 42 out of 100 points and rank 80 out of 180. Wetin e mean be say Nigeria corrupt pass Ghana.

Oda kontris wey also score 26 points wit Nigeria include Cameroon Uganda, Mexico, Madagascar, and Iraq

For di report, Denmark na di least corrupt kontri as dem score 90 points. Finland na second as dem score 88 points, and Singapore come third as dem score 84 points.

Na European kontris dominate di top 10 veri clean list and no African kontri dey inside.

Meanwhile, na Seychelles top di list of least corrupt African kontris as dem get 72 points out of 100 and rank 80 out of 180.

Na Cabo Verde follow Seychelles for back as dem get 62 points out of 100 and rank 35 out of 180.

South Sudan, Somalia, and Venezuela na di most corrupt kontris for 2024.

"Di 2024 Corruption Perceptions Index (CPI) show say corruption na dangerous problem for evri part of di world, but change for di beta dey happun for many kontris," di chair of Transparency International, Francois Valeria, tok.

"Research also reveal say corruption na major threat to climate action. E dey hinder progress in reducing emissions and adapting to di unavoidable effects of global heating."

Di CPI dey rank 180 kontris and territories worldwide by dia perceived levels of public sector corruption.

Dem dey give di results on a scale of 0 (highly corrupt) to 100 (veri clean)."

Valeria tok say while 32 kontris don significantly reduce dia corruption levels since 2012, work still dey to do.

According to Valeria, 148 kontris don remain for di same spot or get worse.

"Di global average of 43 don stand still for years, while over two-thirds of kontris score below 50. Billions of pipo live in kontris wia corruption dey destroy lives and undermine human rights," Valeria tok.

How some African kontris perform

72. Seychelles

62. Cabo Verde

57. Botswana

57. Rwanda

51. Mauritius

49. Namibia

45. Benin

45. Côte d'Ivoire

45. São Tomé and Príncipe

45. Senegal

42. Ghana

41. Burkina Faso

41. South Africa

41. Tanzania

39. Tunisia

39. Zambia

38. Gambia

37. Ethiopia

37. Lesotho

37. Morocco

34. Algeria

34. Malawi

33. Sierra Leone

32. Angola

32. Kenya

32. Togo

31. Djibouti

28. Guinea

27. Eswatini

27. Gabon

27. Liberia

27. Mali

26. Cameroon

26. Madagascar

26. Nigeria

26. Uganda

25. Mozambique

24. Central African Republic

23. Congo

21. Chad

21. Comoros

21. Guinea-Bissau

21. Zimbabwe

20. Democratic Republic of the Congo

17. Burundi

15. Sudan

13. Equatorial Guinea

13. Eritrea

13. Libya

9. Somalia

8. South Sudan

Ten cleanest kontris wit best marks

90. Denmark

88. Finland

84. Singapore

83. New Zealand

81. Luxembourg

81. Norway

81. Switzerland

80. Sweden

78. Netherlands

77. Australia

Ten most corrupt kontris

8. South Sudan

9. Somalia

10. Venezuela

12. Syria

13. Yemen

13. Libya

13. Eritrea

13. Equatorial Guinea

14. Nicaragua

15. Sudan