Fifa club world cup draws for 2025

Manchester City wey be defending champions go face Juventus in di group stage of di Fifa Club World Cup next summer, wia Chelsea go meet Brazilian side Flamengo.

Pep Guardiola City, wey beat Brazilian team Fluminense take win di tournament for di first time for 2023, go start dia title defence against Moroccoan side Wydad and dem go also play Al Ain of di United Arab Emirates for Group G.

Chelsea, wey be 2021 final winners, dem go face Mexico Club Leon and Tunisian team Esperance Sportive de Tunisie for Group D. Di new Fifa Club World Cup, wey dem don expand go 32 teams, go happun for United States between 15 June and 13 July next year.

Fifa Club World Cup 2025 draw in full

Group A: Palmeiras, FC Porto, Al Ahly, Inter Miami

Group B: Paris St-Germain, Atletico Madrid, Botafogo, Seattle Sounders

Group C: Bayern Munich, Auckland City, Boca Juniors, Benfica

Group D: Flamengo, Esperance Sportive de Tunisie, Chelsea, Club Leon

Group E: River Plate, Urawa Red Diamonds, Monterrey, Inter Milan

Group F: Fluminense, Borussia Dortmund, Ulsan, Mamelodi Sundowns

Group G: Manchester City, Wydad, Al Ain, Juventus

Group H: Real Madrid, Al Hilal, Pachuca, Salzburg

Inter Miami go play di opening match afta dem take controversial spot

Dem do one long and complicated draw ceremony for two different locations for Miami wey last more dan 90 minutes, and for di event dem show di new Club World Cup trophy.

US president-elect Donald Trump still send video message, and e daughter Ivanka draw di first team.

Lionel Messi Inter Miami go face Egyptian team Al Ahly for di opening match wey go happun for Hard Rock Stadium, Miami.

For oda matches, Paris St-Germain dey for Group B wit Atletico Madrid, wia Bayern Munich go meet Benfica for one all-European group-stage clash.

Teams go play each oda once for di group phase, and di top two from each group go enter di knockout stage.

Matches go happun for 12 venues across di US, wey go still join Canada and Mexico host di 2026 World Cup.

But Fifa dey face wahala from player unions and leagues about di timing of di tournament, as e go start two weeks after di Champions League final for di end of di 2024-25 European calendar and finish five weeks befor di 2025-26 Premier League season.

Fifa believe say di dates go give players enough rest befor dem start dia local leagues.

Di Club World Cup wey befor na annual tournament wit only seven teams go now dey happun every four years.

Streaming platform DAZN don get exclusive rights to show next summer's tournament, wey go feature 63 matches for 29 days.