Abisola Kola-Daisi daughter of former Oyo govnor don die

Abisola Kola-Daisi, wey be di eldest daughter of di former govnor of Oyo State, late Abiola Ajimobi, don die, family sources confam.

Abisola Kola-Daisi die at di age of 44.

Her death come four years afta her papa late Abiola Ajimobi die.

Abiola Ajimobi wey be di former govnor of Oyo State south-west Nigeria die from multiple organs failure following complications from COVID19 infection.

For 2020, deadi bodi of late Ajimobi bin enta grave for di presence of im family member for im house garden wey dey Oluyole for Ibadan, capital of Oyo State.

Sympathisers say di death of Abisola na big blow to di Ajimobi family.

Di senator wey dey represent Oyo South Senatorial District for di National Assembly, Sharafadeen Alli express sorrow ova di death of di late govnor daughter.

For im statement on Thursday Senator Alli through im special Adviser on Media, Akeem Abas, e say di death na tragic and painful loss, 'not just to her family but to Oyo State and di nation at large.'

Di senator say di former govnor daughter die for UK, meanwhile na just March 12 her mama bin wish her happy birthday.

Abisola serve as special Adviser to di Minister of Budget and Planning, Senator Atiku Bagudu bifor she die, and dey known as a brilliant and accomplished professional.

"Bisola na woman of grace, intellect, and dedication, wey uphold di values of excellence and service."

"Her sudden departure dey deeply heartbreaking. I pray say di Almighty grant her eternal rest and comforts her loved ones in this difficult time," Alli tok.

Who be Abisola Kola-Daisi?

Abisola Kola-Daisi na business owner, fashion enthusiast, and shoe lover wey plan to conquer di world wit her skills.

Abisola serve as special Adviser to di Minister of Budget and Planning, Senator Atiku Bagudu bifor she die, and dey known as a brilliant and accomplished professional.

Abisola Kola-Daisi na Nigerian-Lebanese Luxury Retail Entrepreneur and Philanthropist.

According to di profile for her LinkedIn page, she be di Managing Director of Grandex Nigeria Ltd. (Nigeria Heritage FMCG retail and wholesale chain since. 1984).

She also be di Founder of Florence H. Luxury wey dey deal in luxury boutique.

Abisola bin do her birthday for 12 March wia her mama celebrate her well.