Ghana want make Russia extradite 'pick-up artist' dem accuse of secret filming of women and sharing dia videos online
Wia dis foto come from, Jabin Botsford/The Washington Post via Getty Images
Ghana don request make dem extradite one Russian man wey dey allegedly record im sexual encounters wit several Ghanaian women and share di videos online without dia consent.
African and Russian media don identify am as self-styled "pick-up artist" and online blogger wey dey for im thirties wey don travel go Ghana to secretly feem as e dey interact wit women.
News outlets for both kontris tok say di man dey use sunglasses wey get camera to feem some encounters and share am for social media, though officials no confirm am.
Sam George, Minister of Communications, Digital Technology, and Innovations in Ghana, tell tori pipo on Saturday say e don invite di Russian ambassador to discuss di alleged incident wey happun.
Di minister tok say e don ask di Russian ambassador in Accra for Moscow cooperation to help dem get justice for di victims. Russia no dey extradite dia citizens, unless wetin happun dey very serious.
"We go find dat gentleman, we go use all di resources wey we get, to work wit Interpol. We go ask di Russian authorities – na why I invite di Russian Ambassador – to work wit our law enforcement. We wan make dem bring di gentleman back to Ghana, extradite am to Ghana so e go fit face our law," e tok.
Oga George tok say if di suspect no show up, dem go try am for court without am. Report online suggest say same pesin don dey involved in similar illegal acts for Kenya.
Wia dis foto come from, Naa Momo Lartey/Facebook
Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose 'accept and continue'.
End of X post
Also, Agnes Naa Momo Lartey, Minister for Gender, Children and Social Protection in Ghana don warn Ghanian make dem desist from sharing videos of di foreign national wey record and share di intimate videos of Ghanaian women without dia consents.
She tok say preliminary finding suggest say di pesin fit don leave the kontri. Dem add say dis "no reduce di seriousness of di alleged conduct or di State responsibility to pursue accountability."
"Di Ministry of Gender, Children, and Social Protection (MoGCSP) don see reports of foreign national wey allegedly dey engage in sexual activities wit some Ghanaian women and e record and circulate dose act without consent," di statement tok.
"But dat one no reduce di seriousness of wetin dem accuse am of or di State responsibility to make sure say dem get justice. To record and share intimate fotos witout consent na serious crime and e dey violate dignity and privacy."
"Di Ministry dey continue to work wit Ghana Police Service, relevant security agencies, and international partners to explore all di lawful options wey dey available, including cross-border cooperation and mutual legal assistance."
"Support services including psychosocial care and legal assistanc dey coordinated through confidential channels to make sure say privacy and well-being dey intact."
Under Ghana Cybersecurity Act 2020, anybody wey publish explicit fotos of children or adults without full consent fit face up to 25 years for prison.
Authorities for Ghana don dey pay more attention to online abuse, including sexual extortion and romance scams.
Dem don arrest odas wey dey involve in such crimes in di past.
For 2022, court sentence 22-year-old phone repairer, Solomon Doga, 14 years for prison for sharing nude fotos of one Lebanese woman.
E plead guilty for sexual extortion and sharing non-consensual fotos.
Ghana also introduce new laws under di Cybersecurity Act 2020 to punish pipo wey dey share nude fotos or videos online, especially for women and children, mostly for revenge or to blackmail.
