Macron and im wife go present 'scientific evidence' to US court to prove say Brigitte na woman, lawyer tok

Emmanuel Macron and im wife, Brigitte, dey plan to present photographic and scientific evidence to one US court to prove say Mrs Macron na woman.

Dia lawyer tok say di French president and Mrs Macron go present di documentation inside one defamation suit dem don take against di right-wing influencer Candace Owens afta she promote her belief say Brigitte Macron na boy wen dem born am.

Ms Owens lawyers don reply wit motion to dismiss di claim.

Speaking to BBC Fame Under Fire podcast, di Macrons dia lawyer for di case, Tom Clare, tok say Mrs Macron find di claims "incredibly upsetting" and dem be "distraction" to di French president.

"I no wan tok say di mata don somehow throw am off im game. But just like anybody wey dey manage between im career plus family life, wen your family dey under attack, e go tell on you. And e no dey immune from dat bicos e be president of a kontri," e tok.

Oga Clare say "expert testimony go dey and e go dey scientific in nature" and while im no go reveal, for dis stage, di exact nature, e say di couple dey prepared to demonstrate fully "both generically and specifically" say di allegations na false.

"E dey incredibly upsetting to reason say you gatz go subject yourself, to put dis type of proof forward," e tok.

"Na process wey she must go through to prove herself to di public. But she dey ready and willing to do am. She don make up her mind to do whatever e take to set di record straight.

"If dat unpleasantness and dat discomfort na wetin she go need to set di record straight and stop dis, she dey 100% ready to carry dat burden."

Wen dem ask if di Macrons go supply pictures of wen Brigitte get belle and of wen she dey raise her children, Oga Clare tok say di fotos exist and dem go present am for court wia rules and standards dey.

Ms Owens, one former commentator for conservative US outlet Daily Wire and wey get millions of followers on social media, don repeatedly promote her view say Brigitte Macron na man.

For March 2024, she claim say she go stake her "entire professional reputation" on top di allegation.

Di allegation bin spread for online spaces years earlier, notably through one 2021 YouTube video by French bloggers Amandine Roy and Natacha Rey.

Di Macrons bin initially win one defamation case for France against Roy and Rey for 2024, but dem overturn dat ruling on appeal for 2025, on freedom of expression grounds, no be on di basis of truth. Di Macrons dey appeal di decision.

For July, di Macrons file one lawsuit against Ms Owens for US. Dem allege say she "disregard all credible evidence wey disprove her claim in favour of platforming known conspiracy theorists and proven defamers".

For American defamation cases against public figures, plaintiffs dey required to prove "actual malice" – wey say di defendant purposely spread false information or act wit reckless disregard for di truth.

For August, Emmanuel Macron bin explain to French magazine, Paris Match, why dem choose to pursue legal action.

"Dis na about defending my honour! Bicos dis na nonsense. Dis na pesin wey fully know say di information wey she get na fake, and she dey spread am wit di intention to cause harm, for di service of an ideology and wit established connections to far-right leaders."

Ms Owens lawyers don respond to di Macrons dia lawsuit wit a motion to dismiss, dem argue say di Macrons lawyers no suppose file di suit for Delaware, as she say e no relate to her businesses, wey dey incorporated for di state.

Dem claim say forcing her to defend di case for Delaware go cause "substantial financial and operational hardship".

BBC don approach Candace Owens legal team for comment. Previously, she bin tok say she believe say wetin she dey tok na true and nothing more dey American dan free speech and di ability to criticise.