President Tinubu reward D'Tigress wit national honours, $100,000 each for winning AfroBasket

Nigeria D'Tigress player posing with the AfroBasket trophy
Read am in 3 mins

Nigeria president Bola Tinubu don give di women national basketball team members national honours and cash gift for wining di 2025 Women's AfroBasket for Ivory Coast.

President Tinubu promise to give each player $100,000 and additional $50,000 to members of di technical crew.

Vice President Kashim Shettima, wey represent President Tinubu for di event, announce di reward as im receive di D'Tigress for di presidential villa on Monday 4 August.

During di reception, Tinubu honour evri member of di wining AfroBasket squad wit di Officer of di Order of di Niger (OON) award.

Di vice president hail di team achievement and say dem show strength, resilience, and unity of Nigerian spirit.

"Una make Nigeria proud," Shettima tok. "Una excellence for court once again don put our nation for global map of sporting greatness."

Each player and official for di team go also get one flat each for di Federal Capital Territory (FCT).

Nigeria beat Mali 78-64 to win dia fifth straight title and seventh overall.

Di victory mean say Nigeria na di only kontri to win the women's AfroBasket title five times in a row.

Wakama influence

Nigeria's US coach Rena Wakama reacts in the women's preliminary round group B basketball match between Nigeria and Australia during the Paris 2024 Olympic Games at the Pierre-Mauroy stadium in Villeneuve-d'Ascq, northern France, on July 29, 2024.

Wia dis foto come from, Photo by SAMEER AL-DOUMY/AFP via Getty Images

Di glue wey dey hold dis team togeda na Rena Wakama, dia 33-year-old coach wey her journey wit di team dey remarkable.

Since she take charge as di first female head coach of D'Tigress, Wakama now don win di AfroBasket twice.

"I believe say her ginger, her drive to make name and also prove point to her critics wey bin no feel say she bin dey good enough to take di job na why we dey see dis impact," basketball commentator and analyst Queen John-Moseph bin tell BBC Sport Africa last year.

Udoka, wey bin serve as assistant coach wit D'Tigress, say di job wey Wakama dey do dey "amazing".

"E good for her on to say she dey young and e show di bright future wey she get," di former international add.

Wakama hope say her journey go inspire pipo across di continent to go pursue dia dreams and, most importantly, help grow di women game.

D'Tigress don also qualify for di 2026 Fiba Women World Cup for Berlin, Germany.

Dia victory dey come one week afta Nigeria women national football team victory at di recent Women's Africa Cup of Nations (Wafcon) for Morocco.