How Manchester United fit afford Sesko?

Weda about pipo wey no dey work wey dem comot or free lunches for staff wey dem comot, news wey surround Manchester United finances no dey positive, but how dem take sign Benjamin Sesko.

Di yawa ontop Man United finances don leave fans to dey wonder how dem dey able to fund di move for RB Leipzig striker Benjamin Sesko, as dem dey try use £200m take set dia attack for next season.

Di ansa dey for some of di wise financing of di summer transfers both in and out.

"If Manchester United sneeze, football go catch cold," football finance expert Kieran Maguire tell BBC Sport.

"Na di biggest brand for English football. Di pipo wey comot dey worry, but na business model, dem don do dat for oda companies. Weda e go work for football, we go wait and see."

United sources bin tell di BBC chief football news reporter Simon Stone how e dey possible for dem to reach agreement on Sesko, even though co-owner Sir Jim Ratcliffe tok earlier say dis year di club bin get potential to stand by Christmas witout serious cost-cutting measures.

Dem arrange payment wey reach up to £130m for di deals dis summer for Matheus Cunha and Bryan Mbeumo, from Wolves and Brentford respectively, in a way wey make sense.

E dey likely say any deal for Sesko go dey arranged like dat too, wit di payment spread ova di length of di player contract.

In addition, di entirety of Marcus Rashford £325,000-a-week salary dey covered by im loan move to Barcelona and Manchester United receive £5m from Chelsea afta di Blues pull out of di deal to sign Jadon Sancho.

Manchester United don also receive more dan £15m for payments as part of sell-on clauses wey involve Anthony Elanga, Alvaro Carreras and Maxi Oyedele.

'Dem overblow some of di fear-fear tori dem'

Dem also sell academy products Mason Greenwood and Scott McTominay last summer, and go aim to sell several oda unwanted players bifor dis window close, including Alejandro Garnacho.

"Even if dia signings come to £200m, na £40m a year and dem go recover am by selling players for di 'bomb squad'," Maguire tok.

United also raise money by reaching di Europa League final last season and despite dia struggles for di pitch - including a lowest finish for di Premier League era last season - dem remain commercially powerful.

For June, di club reveal annual core profit forecast of £180m-£190m, up from di earlier projection of £145m-£160m.

United bid for Sesko fit rise to £73.8m, but include a guaranteed payment of £65.2m. If dis na wetin dem go pay for di 22-year-old Slovenian, e go make dia overall transfer expenditure dis summer to be £180m, di third highest for di Premier League afta Liverpool and Chelsea.

"Some of di scare stories put about few months ago dey overblown," Maguire tok.

"Man Utd no dey as successful as business as dem go like to, but dem still dey successful. For example dia wage bill dey around half of dia income, and e dey veri good by Premier League standards."

Dis dey come afta Ratcliffe tok say United come close to running out of cash dis year.

"We dey di process of change and e come for uncomfortable period and disruptive and I dey feel sympathy wit di fans," e tell di BBC.

'Man Utd no dey for good position as Liverpool or Chelsea'

Ratcliffe say costs don rise and di club dey spend more dan dem earn for seven seasons.

"If you spend more dan you earn eventually dat road go lead to ruin," e tok.

Howeva, e also say United go look to spend on players for dis transfer window.

"Wia you wan spend di money? You wan spend am on operating di club, or you wan spend am on di squad?

"Wetin we wan do na to invest for di best players for di world if we fit, rather dan spend am on free lunches."

Tins no dey rosy for Old Trafford, howeva,

If Sesko sign, manager Ruben Amorim go gatz sell first to finance any further addition to im squad.

Di club lose £131m for di 2023-24 financial year. And while quite bit of dat na interest and di costs of di Ineos takeova, wey no count towards PSR, e still no count for di club health.

"Man Utd no fit spend as much as Liverpool and Chelsea," Maguire tok. "Of di 'big six', Man Utd no dey good position.

"But dem still dey good position. Dem get di biggest stadium, so di highest matchday revenues, and dem get one of di highest commercial revenues. Dem be attractive brand."