Nigeria vs Tunisia highlights: Iwobi collect red card after Youssef Msakni goal give Tunisia victory over Nigeria

Nigeria Super Eagles don crash out of di ongoing Africa Cup of Nations afta dem lose 1-0 to Tunisia on Sunday.

Tunisia forward Youssef Msakni 47th minute strike na im prove to be di decisive goal as di Carthage Eagles progress to di quarter-finals.

Nigeria wey win all dia group matches find di Tunisians too difficult to breakdown and dia task to draw level become hard one afta substitute Alex Iwobi collect red card.

Di Everton man bin last only six minutes for pitch before im see red as im bin replace Kelechi Iheanacho.

Wit much expectation before di game, di match fail to deliver on im promise as both teams struggle to create chances and those two incidents wey happun for di second half go now become di talking points of di match.

Di Tunisians na dem go happy pass as na dem go play Burkina Faso for quarter-finals on Saturday, 29 January.

How di match go

Second half

46mins: Taiwo Awoniyi pass di ball to signal di start of di second half.

47mins: Goal for Tunisia! Youssef Msakni long range shot beat Okoye wey try but fail to stop im shot.

50mins: If di game end like dis Nigeria go comot from di tournament while Tunisia go meet Burkina Faso for quarter-final.

53mins: Yellow Card for Laidouni.

55mins: Anoda yellow card for Tunisia, dis time na for Skhiri becos im talk sometin wey di ref no like.

59mins: Substitutions - Iheanacho OFF, Iwobi ON. Olayinka ON, Awoniyi OFF. Meanwhile Aïssa Bilal Laidouni dey ground afta Ndidi foul am.

62mins: Ndidi try im luck from 20 yards. Di shot go over di bar.

64mins: Yellow card for Iwobi aft aim foul Msakni but referee dey go check am for VAR. Referee change di yellow and im don show Iwobi Red card. Nigeria go down to 10-men.

67mins: Moses Simon collect pass inside di box, control di ball and shoot towards di left post but Bechir Ben Said rush out to make good save to stop im effort.

69mins: Substitutions - Naim Sliti come on for Hamza Rafia.

74mins: Substitute Naim Sliti don test Okoye. Di 22-year old goalkeeper parry im shot go oout for corner.

75mins: Samuel Chukwueze don come off, na Umar Sadiq replace am.

77mins: Ndidi no dey happy wit referee N'Diaye afta di ball hit am.

81mins: Good opportunity now for Nigeria as Sadiq Umar don win freekick for good position.

82mins: Moses Simon blaze di freekick over.

86mins Double substitution for Tunisia - Jaziri and Msakni OFF, Khazri and Jebali ON.

88mins: Ndidi wit anoda chance for Nigeria. Di Leicester City man drag im shot wide.

90mins: Chance for Saidq Umar! Di Almeria striker dey through on goal but im shot go narrowly wide. Di referee don add five extra minutes.

90+2mins: Umar Sadiq try to create chance as im dribble im way into di Tunisia 18-yard box but Taibi stop am from running through on goal.

Full Time: Nigeria don comot from Afcon 2021 afta dem lose 1-0 to Tunisia.

First half

1min: Tunisia don take di first kick of di game as dis round of 16 match don start.

2mins: Straight from di kickoff Nigeria win di ball and get cornerkick. Ndidi bicycle kick from di corner go over.

5mins: Tunisia try to counter quickly but Jaziri through ball no meet anybody.

8mins: Both teams dey size each other up as nobody don create any clean chance yet.

10mins: Chance! Youssef Msakni nearly give Tunisia di lead but Troost-Ekong block im goal bound effort.

12mins: Good chance for Nigeria! Simon Moses dribble Mohammed Drager come pass give Aribo wey shoot towards goal but Tunisia defender Bilel Ifa block am from troubling di goalkeeper.

14mins: Nigeria don get three corner kicks now but for those times Tunisia clear dia lines.

18mins: Nigeria don get four shots on goal so far but none don dey on target. Meanwhile Tunisia get one shot wey don dey on target.

20mins: Referee N'Diaye from Senegal don show Kelechi Iheanacho yellow card afta im foul Msakni.

24mins: Elyes Skhiri foul Wilfred Ndidi.

28mins: Nigeria goalkeeper Maduka Okoye get feel of di ball as im catch Drager cross. Okoye don be spectator for di most part of dis match as Tunisia don rarely threaten di Super Eagles.

33mins: No real opening yet so far for di match. Tunisia dey lead for possession as dem get 51%, Nigeria get 49%.

37mins: Di Tunisians dey comfortable wit Nigeria holding di ball while dem sit back dey mark di spaces.

39mins: Hamza Rafia try im luck from distance but im shot no even trouble Okoye for Nigeria goal post.

43mins: Rafia foul Ndidi for Nigeria half.

Di winner of dis game go play Burkina Faso for di quarterfinal afta dem beat Gabon on penalties.

45mins: Referee N'Diaye blow im whistle for half time. Dis scoreline na Nigeria 0-0 Tunisia

How dem line-up

Nigeria line-up: 1. Okoye, 2. Aina, 22. Omeruo, 5. Troost-Ekong, 12. Sanusi, 4. Ndidi, 10. Ayodele-Aribo, 17. Chukwueze, 14. Iheanacho, 15. Simon, 19. Awoniyi.

Tunisia line-up: 22. Saïd, 20. Dräger, 2. Ifa, 3. Talbi, 5. Haddadi, 25. Ben Slimane, 17. Skhiri, 28. Laidouni, 7. Msakni, 11. Jaziri, 19. Rafia.