دا مهال شاوخوا يو لک او څلوېښت زره ماشومان د زده کړې له نعمته بې برخې پاتې دي او شاوخوا 172 ښوونځي طالبانو له منځه وړي دي، چې 60 يې د هلکانو او نور د نجونو دي .

شخصي ښوونځيو ويلي دوی د پاکستان له امنيتي چارواکو نه داسې ضمانت نه دی ترلاسه کړی، چې د زده کوونکو، د هغوی د ميندو او پلرونو او ښوونکو امنيت وساتي .

دوی ويلي چې ترهغه به خپل ښوونځي نه پرانيزي چې طالبانو د تېرې مياشتې هغه ګواښ بېرته نه وي اخيستی چې د نجونو ښوونځي به الوزوي .

تر دې وړاندې په سوات کې د وسله والو طالبانو يوه مشر ويلي وو چې د نجونو ښوونځي دې وتړل شي.

دوی وايي چې په سوات کې د نجونو د زده کړې په ښوونځيو کې اسلامي شريعت نه مراعاتېږي او پردنه نه کوي .

دوی دا هم وايي چې نجونې او هلکان يو ځای زده کړه کوي چې دا د اسلام له اصولو سره په ټکر کې ده .

خو داسې ښکاري چې په سوات کې نه کوم پوهنتون او يا کالج شته چې نجونې او هلکان دې يوځای زده کړه وکړي، خو د ويلو ده چې له لومړي ټولګي تر پنځمه واړه ماشومان سره ګډه زده کړه کوي .

	په سوات کې خلک اندېښمن دي او خپل ماشومان يې خوندي ځايونو ته د زده کړې لپاره لېږدولي دي.

په سوات کې عام خلک هم ډېر په اندېښنه کې دي او د اورپکو دغه ګواښ يې غندلی دی .

ويل کېږي چې په سواتې کې شاوخوا يونيم سل ښوونځي يا سوځول شوي او يا هم تړل شوي دي. او په سيمه کې د حکومت واک ډېر کم ليدل کېږي .

په سوات کې وسله وال طالبان د اف ايم راديو له لارې خپل اعلانونه او ګواښونه کوي او خلک اړ دي له وېرې نه د دوی خبره ومني .

دا مهال شاوخوا يو لک او څلوېښت زره ماشومان د زده کړې له نعمته بې برخې پاتې دي او شاوخوا 172 ښوونځي طالبانو له منځه وړي دي، چې 60 يې د هلکانو او نور د نجونو دي .

د رپوټونو له مخې 18 داسې ښوونځي هم شته چې په هغو کې پوځ اړولي دي او امنيتي پوستې يې په کې جوړې کړې، او پنځه نور ښوونځي طالبانو د خپلې لومړۍ کرښې په توګه کاروي .

دا مهال له سواته ډېری خلک خپل ماشومان خوندي ځايونو ته لېږدوي او هلته يې په نورو ښوونځيو کې شاملوي .