ايتراجان انبراسان لندن

	د دوشنبې په شپه هم په سوات کې ښوونځي وسوځول شول چې کتابتون او ټولگي پکې ويجاړ شول

وړمه شپه په سوات کې د نجونو درې ليسې وسوځول شوې . په تيرو پنځو ورځو کې دغلته دولس ښوونځي ويجاړ شوي دي .

د پاکستان د سوات په دره کې د وروستيو وختونو په تاوتريخوالي کې د نجونو ښوونځي اصلي هدفونه گرځيدلي دي .

د دوشنبې په شپه د نجونو يوه ليسه د مټې په سيمه کې وسوځول شوه ، د ښوونځي کتابتون او ټولگي په بشپړ ډول اور وسوځول .

په همدغه سيمه کې تر دې وروسته دوه نور ښوونځي ويجاړ شول . دا ښوونځي د ديني درسونو يعنې مدرسې نه وې .

زده کوونکيو ته د حکومت له خوا ټاکل شوى نصاب ښوول کيدۀ . خو اورپکې ډلې چې په دغه سيمه کې شرعي قانون غواړي ، غوښتنه لري چې دغه ښوونځي وتړل شي .

په دغه سيمه کې تر هغه وروسته په پرتلييزه توگه کراري وه چې د حکومت او اورپکو ترمنځ د سولې تړون وشو .

خو تيره اوونۍ دغه په مات پاڼ ولاړه کراري هغه وخت ختمه شوه چې په دره کې د دواړو غاړو ترمنځ نښتې وشوې .

په ځواب کې اورپکو د حکومت پر ځايونو او پر حکومتي ښوونځيو بريدونه پيل کړل چې مخالفان يې د حکومت مهم سمبولونه گڼي .

په دې وروستيو مياشتو کې د سوات په دره کې نژدې اويا ښوونځي سوځول شوي دي چې تر اويا زرو ډير زده کوونکي يې له ښوونې و روزنې بې برخې کړي دي .

د چا چې په وس پوره وي وار دمخه له سيمې وتلي دي خو داسې ښکاري چې بې وزلي کسان بې له دې چې خپلې لوڼې په کور کښېنوي بله لار نه لري .