ځينو رسنيو د الظواهري د وژل کېدو يا ټپي کېدو خبرونه ورکړي وو.

په امريکا ځينو رسنيو ويلي وه چې د القاعد ډلې دويم لوړپوړى چارواکى ايمن الظواهري ښايي په دې وروستيو ورځو په هوايي بمبار کې وژل شوى وي .

د بي بي سي اس نيوز تلويزيوني چينل ويلي وه چې يو داسې شفر لرونکى پيغام يې تر گوتو کړى چې په پاکستان کې له يوه ناڅرگند ځايه لېږل شوى او په بېړنۍ توگه يې د الظواهري د درملنې غوښتنه کړې ده .

دغه تلويزيوني چينل ويلي چې دغه پيغام د بيت الله مسعود له خوا لېږل شوي، چې په کې د '' الظواهري د سختو ټپونو او دردونو خبره شوې ده''، چې اوس يې ټپونه '' ميکروبي'' شوي دي .

خو د مسعود وياند مولوي عمر ويلي چې :'' موږ دا په ټوليز ډول ردوو.''

د پاکستان پوځي او استخباراتي مسوولينو په هغه راکټي بريد کې د الظواهري په ټپي کېدو ناخبرې ښوولې ده، چې د تېرې دوشنبې په ورځ په جنوبي وزيرستان کې شوى و .

بل خوا امريکايي چارواکو هغه هم د دغه بريد په اړه نور جزييات نه دي ورکړي، چې د پاکستان د څارگرې ادارې په وينا په کې د القاعده ډلې د چاودېدونکيو توکيو کارپوه ابوخباب المصري له خپلو پنځو نورو ملگرو سره وژل شوى دى .