ډېر ځله د امريکا جنگي او مدني کښتۍ د سويس له کانال نه تېرېږي .

د راپورونو په وينا دغه وړه بېړۍ د سويس په کانال کې د امريکا پوځي توکيو نقلوونکې 'گلوبل پټريوټ' بېړۍ ته د سيمه ييزو توکيو پېرلو په موخه نژدې شوه چې امريکايۍ بېړۍ پرې ډزې وکړې .

د مصري سرچينو په وينا د مصري بېړۍ د ناپامۍ له امله د امريکايي بېړۍ کارکوونکو پرې ډزې وکړې چې له په پايله کې د محمد فواد په نامه يو مصرى وگړى ووژل شو او دوه نور ټپيان شول .

له پېښې وروسته لس گونه مصري بېړۍ تر امريکايي بېړۍ راچاپېرې شوې او د پېښې د څېړلو په موخه يې په لاريون کولو لاس پورې کړ .

د نړۍ سمندري سوداگري په سلو کې اووه برخې د سويس کانال له لارې کېږي .

د سويس کانال شاوخوا ١٩٠ کيلومتره اوږد او سور يې ١٢٠ متره دى .

مصري چارواکي وايي چې دغې امريکايۍ بېړۍ د سمندر له لارې له دوبۍ څخه د مديترانې سمندرگي ته پوځي توکي نقلول .

گلوبل پټريوټ هغه باروړونکې امريکايي بېړۍ ده چې د پټريوټ ددفاعي سيسټم بټرۍ، مهمات او د ماين ضد توکي د نړۍ هر گوټ ته نقلوي .

د نوموړې امريکايۍ بېړۍ څښتن وايي چې ددې پېښې په اړه هېڅ معلومات نه لري .

د فرانسې خبري اژانس وايي چې دغه امريکايي 'گلوبل پټريوټ ' بېړۍله سره سمندرگي تېره او هاخوا د سويس کانال له لارې منځني سمندرگي ته د پورېوتو په انتظار وه چې مصري وړې کښتۍ ورنژدې شوې چې خپل سيمه ييز توکي د امريکايي بېړۍ په سپرلۍ وپلوري .

د امريکايي بېړۍ پر سر امريکايانو مصري کښتيو ته د تم کېدو خبر ورکړ خو سره له دې ورنژدې شوې او پټريوټ پرې ډزې وکړې .

بل پلو امنيتي سرچينې وايي ټاکل شوې وه چې امريکايي بېړۍ د سې شنبې په ورځ په شپږو بجو د سويس له کانال نه تېره شي .

خو په قاهره کې د بي بي سي خبريال هبا صالح وايي چې د القاعده جنگيالو وړاندې هم له کوچنيو کښتيو څخه د يمن په سواحلو کې پر بهرنيو او امريکايي پوځي بېړيو بريدونه کړي ول .

نوموړى زياتوي چې په مصر کې له کوچنيو کښتيو څخه د کاليو د پېرلو او لېږدولو په برخه کې گټه اخيستل کېږي .