بابرا پلېټ له اسلام اباد څخه

	ځايي خلک وايي توغندي بې پېلوټه امريکايي الوتکو توغو لي دي خو د دې خبرې پخلى نه دى شوى

د رپوټونو ترمخه د سويلي وزيرستان په سيمه کې دغه بريد يو کور ويجاړ کړى چې ښايي اورپکې پکې ديره و .

د پاکستان د پوځ وياند تر وروستيو رپوټونو پورې لا ويل چې د دغه خبر د نورو جزيياتو په لټه کې دى .

ځايي خلکو ويل چې گڼ شمير توغنديو واڼې ته نژدې په يوۀ کلي کې د ځايي قبايلو يو کور په نخښه کړ .

واڼه د سويلي وزيرستان مرکز دى . ځايي خلک په دې باور دي چ له طالبانو سره تړاو لرونکي وسله وال کسان دغلته اوسيدل او اورپکو دغه سيمه کلابنده کړې وه چې له کاڼو گټو يې مړي ايستل .

د ځايي خلکو په وينا دغه بريد يوې بې پېلوټې امريکايي الوتکې ترسره کړى دى خو د دغې خبرې رسمي پخلى لا تر اوسه نه دى شوى .

په دې وروستيو کلونو کې څو ځلې امريکايي ځواکونو د پاکستان په قبايلي سيمه کې د طالبانو او القاعدې په شکمنو ځايونو توغندي توغولي دي.

خو امريکايي او پاکستاني چارواکي د دغه ډول بريدونو پخلى ډير کم کوي ځکه چې دغه رنگ بريدونه په سيمه کې خلک نه خوښوي .

ځکه چې دغه ډول بريدونه د پاکستان پر خاورې تيرى بلل کيږي او کله نا کله پکې بې وزلي خلک هم وژل کيږي .