اوربند له ماتېدا وروسته ٢٠٠ فلسطینیان وژل شوي

په غزه تراډه کې روغتيايي چارواکي وايي تېره ورځ د لنډ مهالي اوربند له ماتېدو وروسته، د اسراييلو په بريدونو کې ٢٠٠ فلسطينيان وژل شوي دي.

تر ټولو درنه بمباري په رفح سيمه کې شوې، چې باور کېږي يو اسراييلي سرتيرى په کې د حماس د وسلوالو له لوري نيول شوى دى.

اسراييلي چارواکي وايي د وسلو جوړولو د يوې فابريکې، او د وسلوالو د قومندې د يوۀ مرکز په گډون سلگونه موخې په نښه شوي دي.

فلسطيني اورپکو هم پر اسراييلو خپلو توغنديزو بريدونو ته دوام ورکړى دى.

په مصر کې د پلان شويو خبرو اترو سره سره تاوتريخوالي دوام موندلى.

ټاکل شوې وروسته يو فلسطينى پلاوى د مصر پلازمېنې قاهرې ته ورسېږي، خو دا لا نه دهڅرگنده چې اسراييل به هم خپل پلاوى خبرو اترو لپاره واستوي او که څنگه.

د تېرې جمعې په ورځ د اسرائیلو او حماس ترمنځ اوربند مات شو، په تېرو ۲۴ ساعتونو کې پر غزې او رفح د اسراييلو بریدونو ٢٠٠ فلسطینیان وژلي.

دوه اسرائيلي پوځيان وژل شوي او درېیم هغه یې ورک شوی دی.

پر غزې د اسرائیلو برید پنځه ویشتمې ورځې ته وغځېد.

د حماس او اسرائیلو ترمنځ ۷۲ اوربند ایله څو ساعته دوام وکړ، خو د دواړو غاړو له لوري بریدونو اوربند له منځه یووړ.

حماس ویلي، هغه اسرائیلی پوځي، چې اسرائیلو یې د تري تم کېدو اعلان کړی، دوی نه دی نیولی، خو په وینا یې غالباً وژل شوی به وي.

دغه اسرائیلی پوځي د حماس جنګیالیو د یوه تونل ویجاړولو پرمهال نیول شوی دی.

وړاندې د امریکا ولسمشر بارک اوباما د فلسطین او حماس ترمنځ روان کړکېچ "زړه بوږنوونکی" بللی و چې په وینا یې د یوه بل اوربند هڅه به وکړي:

"د دواړو غاړو ترمنځ د جګړې په اور کې ولسي وګړي سوځي"، خو په وینا یې حماس باید وښيي چې د روان کړکېچ پای ته رسولو لپاره ژمن دی.

د شنبې ورځې تر ګهیځ ناوخته پورې پر غزې اسرائیلي بمبارۍ روانې وې، چې د غزې د روغتیايي چارواکو په وینا، د اوربند تر ماتېدا وروسته، په تازه بریدونو کې نژدې ۱۰۰ فلسطینیان وژل شوي.

په غزه کې له حماس سره د ۷۲ ساعته اوربند له ماتېدو وروسته، اسرائیلي ځواکونه د خپل یوه پوځي په لټه کې دي چې ګومان کېږي نیول شوی دی.

نن غزه کې پر ځايي وخت شاوخوا ۹:۳۰ د اسرائیلو دوه سرتیري ووژل شول.

د غزې د روغتیا وزارت ویلي چې د اسرائیلو په بمبارۍ کې لسګونه خلک وژل شوي دي.

په ۲۰۰۶ کال کې هم فلسطیني اورپکو د ګیلاد شلیت په نوم یو اسرائیلي سرتیری نیولی او تر پنځو کلونو پورې یې بندي ساتلی و.

نوموړی سرتیری بیا د ۲۰۱۱ کال په نومبر کې د ۱۰۰۰ فلسطیني بندیانو په بدل کې خوشې شوی و.په غزه کې له تېرو درېو اونیو راهیسې په روانه جګړه کې تر اوسه ۱۴۶۰ فلسطینیان او ۶۳ اسرئیلیان وژل شوي دي.

د وژل شویو فلسطینیانو ډیری ولسي وګړي دي او د اسرئیلو ډیری وژل شوي بیا پوځیان دي.

پر دغه ۷۲ ساعته اوربند د امریکا او ملګرو ملتونو له منځګړتوب وروسته هوکړه شوې وه چې ولسي وګړي د یو څه وخت لپاره له تاوتریخوالي وژغورل شي.

سپینې ماڼۍ حماس د اوربند پر ماتېدو پړ ګڼلی او پر اسرائیلي پوځیانو یې د دغې اورپکې ډلې برید وحشي بللی.

د امریکا د ملي امنیت مرستیال سلاکار ټوني بلینکین ویلي: "دا یو ناوړه عمل دی او موږ تمه لرو چې زموږ تر څنګ به نوره نړې هم دغه کړنه وغندي".

بل خوا بیا د جمعې پر ورځ د فلسطینیانو او اسرائیلو استازي قاهرې ته د یوه اوږد مهال اوربند د رامنځ ته کېدو په هیله رسېدلي وو. خو مصري چارواکو ویلي چې دغه خبرې اوس ځنډول شوې دي.