مصر له وخته مخکې د ولسمشرۍ ټاکنو اعلان وکړ

د مصر موقتي حکومت اعلان وکړ چې د ولسمشرۍ ټاکنې یې رامخکې کړې.

دغه اعلان د مصر موقت ولسمشر عدلي منصور په یوې تلویزیوني وینا کې وکړ او زیاته یې کړه چې د ټاکنو د رامخته کولو پرېکړه له سلا مشورو وروسته شوې ده.

دا په دې مانا ده چې اوس به په مصر کې لومړی د ولسمشرۍ او وروسته به پارلماني ټاکنې ترسره کېږي.

د بي بي سي خبریالان وايي له دې ګام سره ښايي هغه آټکلونه هم ډېر شي چې وايي د پوځ مشر جنرال عبدالفتاح السیسي به ټاکنو ته ودرېږي.

وروسته له هغه چې د جولائ میاشت په وروستیو کې د جنرال السیسي په مشرۍ پخوانی ولسمشر محمد مرسي له واکه لیری کړای شو ګڼو خلکو له جنرال السیسي وغوښتل چې د ولسمشرۍ په ټاکنو کې سیالۍ ته ودرېږي.

خو ځیني نور خلک اندېښنه لري او وايي چې که جنرال السیسي ټاکنو ته ودرېږي او ټاکنې وګټي ښايي یو ځل بیا د تېرو شپږو لسیزو په څیر پوځ د واک په ګدۍ کیني.

ځیني نور بیا جنرال عبدالفتاح السیسي یو پیاوړی کس بولي او وايي چې مصر ورته اړتیا لري.

ښاغلي مرسي د مصر لومړنی ولسمشر و چې په دیموکراتیک ډول انتخاب شوی و خو د ده د واکمنۍ پرضد له پراخو مظاهرو وروسته له واکه لیری کړای شو.

تاوتریخوالی

په همدې حال کې د مصر د روغتیا وزارت وايي وروستۍ شمېرې ښيي چې د پخواني ولسمشر حسني مبارک پر وړاندې د پاڅونونو د دریمې کلیزې په ياد په بېلا بېلو ښارونو کې د مظاهرو پرمهال لږترلږه ۴۹ تنه وژل شوي دي.

دغه کسان د پوځي حکومت پلوه او د هغوی د مخالفینو ترمنځ په نښتو کې وژل شوي چې ډېری یې د قاهرې دي.

رپوټونه وايي په نښتو کې نژدې ۲۵۰ تنه ټپیان شوي هم دي.

د مصر د کورنیو چارو وزرات په یوې اعلامیې کې ویلي تر ۱۰۰۰ ډېر هغه مظاهره کوونکي نیول شوي چې چړې، پیټرولي بمونه او نورې وسلې یې له ځانونو سره لېږدول.