د اوونۍ په پاې کې د پلازمېنې کېراکس یو شمېر اوسېدونکو دغه ښار کې احتجاج وکړ، دوی له حکومته غوښتل، چې د چاوېز د روغتیا په اړه بشپړ معلومات ورکړي.
د وېنزویلا حکومتي چارواکي د دغه هېواد ناروغ ولسمشر هوګو چاوېز تنفسي ناروغي سخته شوې. ۵۸ کلن ولسمشر هوګو چاوېز تېره میاشت کیوبا کې د سرطان ناروغۍ له امله له درملنې وروسته هېواد ته ستون شوی.
د حکومت له لوري په دولتي ټیلویزیون یوه اعلامیه خپره شوې، چې په کې ویل شوي، د ښاغلي چاوېز تنفسي ناروغي سخته شوې او نوموړی په سخت تنفسي انفکشن اخته شوی.
د وینزویلا د اطلاعاتو وزیر ایرنېسټو ویلیګس د ولسمشر چاوېز د روغتیايي حالت په اړه ویلي، چې اوس یې هم وضعیت نازک دی.
د پلازمېنې کاراکاس له پوځي روغتونه د خبرو پر مهال نوموړي وویل " نن تنفسي انفکشن زیات شوی."
د نوموړي په وینا د ولسمشر چاوېز کیموتهراپي او درملنه دوام لري. د تېرې اوونۍ په پاې کې د پلازمېنې کاراکاس یو شمېر اوسېدونکو دغه ښار کې احتجاج وکړ، دوی له حکومته غوښتل، چې د چاوېز د روغتیا په اړه بشپړ معلومات ورکړي.
د ناروغۍ پیل
په ۲۰۱۱ کې د جراحي عملیاتو په بهیر کې معلومه شوه، چې چاوېز په سرطان اخته دی، له هغه راهیسې تر اوسه د ۱۸ میاشتو په اوږدو کې د درملنې لپاره د نوموړي څلور جراحي عملیات شوي.
څو ورځې مخکې د وینزویلا مرستیال ولسمشر نکولاس مدرورو ویلي و، چې هوګو چاوېز د مرګ او ژوند تر منځ د کشمکش په حالت کې دی.
مرستیال ولسمشر د وینزویلا ټیلویزیون ته ویلي و، چې زموږ قومندان ناروغ دی، ځکه ده د هغو لپاره ژوند کاوه، چې هېڅ نه لري.
مرستیال ولسمشر، چې د چاویز ټاکل شوی، ځای ناستی بلل کېږي، ویلي" هغه د خپل ژوند پراوه نه کوله، ځکه خپل ژوند او روح یې خلکو ته بښلي وو، هغه د ژوند او روغتیا لپاره جګړه کوي او موږ ورسره یو."
