هغه عادتونه چې د غږ زړښت مخه نیسي

بریتانوي سندرغاړي او کمپوزر سر اېلټن جان، سږکال د ګالسټونبري موسیقۍ فستیوال په تاریخ کې، په ژوندۍ بڼه تر ټولو ډېر لیدل شوي سندرغاړي ریکارډ جوړ کړ.

دا هغه تاریخي شېبې وې چې له اوو میلیونو څخه زیاتو کسانو د بي بي سي له لارې د سر اېلټن جان وروستی فعالیت ولید.

دغه ۷۶ کلن سندرغاړي په زړه پورې ننداره ترسره کړه، خو د هغه په غږ کې بدلون به ښايي یوازې هغه چا حس کړی وي چې له لسیزو راهیسې د هغه غږ اوري.

د هغه په غږ کې یوازې هغه وخت لږ بدلون راغلی و چې په ۱۹۸۰ کال کې یې د ستوني عملیات وکړ.

پوښتنه دا ده چې ایا کولای شو د عمر په زیاتېدو سره پر خپل غږ د اغېزو مخه ونیسو؟

دا باید هېره نه شي چې غږيز تارونه زموږ له ستوني څخه غږ تولیدوي. حنجره په تنفسي سیستم کې یوه مهمه برخه ده.

په حقیقت کې دا د نل په څېر ده چې هوا د ستوني له لارې زموږ سږو ته لېږدوي. کله چې د تنفس په بهیر کې هوا له حنجرې تېرېږي، غږ جوړوي.

د هلکانو او نجونو غږونه تر بلوغ مخکې یو څه توپیر لري، خو د بلوغ پر مهال له غږ سره تړلي هورمونونه فعالیت پیلوي.

دا بهیر د حنجرې جوړښت بدلوي، د نارینه غږ نسبتا درنېږي. خو ښځینه وو غږ بیا له ۲۰ تر ۳۰ سلنې نری کېږي.

هورمونونه ان کولای شي تر بلوغیت وروسته، په غږ اغېز وکړي. د بېلګې په توګه، د یوې مېرمنې غږ ښايي د هغې د میاشتنۍ دورې پر مهال بدل شي.

په غږ کې بدلون اصلا د عمر په ۳۰ کلنۍ کې پیلېږي

د بدن د هرې بل غړي په څېر غږ هم خپل عمر لري، خو دا بدلونونه ښايي د هر چا لپاره د پام وړ نه وي.

کله چې انسان زړېږي، حنجره د معدني موادو په زیاتولو او زېرمې پیل کوي، چې ورو ورو د غضروف یا هډوکي په څېر کېږي.

په بدن کې دا بدلون د عمر په ۳۰ کلنۍ کې پیلېدای شي، په ځانګړي ډول د نارینه وو پر غږ اغېز کوي.

په ورته وخت کې، په زیاتره کسانو کې د عضلاتو پخېدل د نورو عضلاتو په څېر د غږ پر تولید هم اغېز کوي.

د سږو د عضلاتو فعالیت کمښت هم له سینې د هوا ځواک کموي او نه شي کولای د پخوا په شان غږ تولید کړي. په دې سره د ټول سیسټم کنټرول وړتیا کمېږي، دغه راز د محافظتي بلغم تولیدونکي غدود یا تانسل کمښت لیدل کېږي.

پر غږ د سګرټو څکولو او الکولو اغېزې

که څه هم د ډېرو خلکو غږيز تارونه په پراخه کچه یو شان عمر لري، خو زموږ د ژوند بڼه کولای شي، حنجرو ته د زیان رسولو خطر زیات کړي.

د بېلګې په توګه، سګرټ څکول د حنجرې د پاړسوب لامل کېږي او د بلغم تولید زیاتوي او ورسره محافظتي غشا وچوي، الکول هم ورته بدې اغېزې لري.

د وخت په تېرېدو سره، دا فکتورونه کولای شي غږیزو تارونو ته زیان ورسوي او په دې توګه د انسان غږ بدل کړي.

ځینې درمل هم کولای شي زموږ د غږ د بدلون لامل شي، لکه د انهېلر په وسیلې د ساه اخیستلو لپاره ځینې درمل.

همدا شان د عضلاتو ارامونکي درمل هم کولای شي د ستوني خارښت او غږ بدلېدو لامل شي. خو دا بدلون معمولا لنډ مهالی وي.

د خپل غږ ډېر زیات کارول

بله لاره چې زموږ پر غږ اغېزه کولای شي د غږ بدلول دي. دا چاره معمولا په سندرغاړو او نورو خلکو کې لیدل کېږي، چې د کار پر مهال خپل غږ ډېر کاروي.

د بېلګې په توګه ښوونکي او یا هم ورزشي روزونکي.

په ډېری قضیو کې استراحت او د سګرټو او الکولو په شان روغتیا ته د زیان رسونکو توکو کارولو څخه ډډه کول، ګټور دي.

د طبي کارپوهانو په خبره، د وینا پر مهال د غږ انډول ته پام، کولای شي د غږ بدلېدول مخه ونیسي.

که څه هم د غږ په تارونو کې په عمر پورې اړوند بدلونونو مخه نشي نیول کېدای، خو موږ کولای شو د دوامداره تمرین له لارې د خپل غږ کیفیت او وړتیا وساتو.