د کوسوو د شمال احتجاجونو کې د ناټو ۳۰ سوله ساتي ټپيان شوي
د عکس سرچینه، Shutterstock
کوسوو کې له صرب احتجاج کوونکو سره اخ و ډب کې د ناټو سوله ساتي ځواک ۳۰ سرتېري ژوبل شوي دي.
دغه پوځي سازمان وايي، دا وړ بریدونه په چورلټ ډول د منلو نه دي او دوی یې غندي.
دا لانجه د کوسوو شمال کې په خټه د البانیايي ښاروالانو د ټاکل کېدو پر سر راپورته شوې ده.
د دغه ځای صرب اوسېدونکي له ځايي پولیسو او هلته د ناټو له مېشتو سوله ساتو ځواکونو سره اخ و ډب کې ښکېل شوي.
رپوټونو کې راغلي چې امنیتي ځواکونه تر هغې وروسته د اوښکې بهوونکي ګاز او لوړ غږ لاسي بمونو کارولو ته اړوتل، چې احتجاج کوونکو په زوچان ښار کې پر دولتي ودانیو د ورختلو هڅه وکړه.
دا کړکېچ اصلآ تېر اپرېل کې تر هغې وروسته پیل شو چې د کوسوو ځايي صرب اوسېدونکو سیمه ییزو ټاکنو سره پرېکون وکړ.
دا د دې لامل شو چې البانیايي توکمه نوماندان د ځايي شوراګانو کنټرول لاس کې واخلي.
خو په دغو ټاکنو کې د ګډون کچه تر څلور سلنې هم ټیټه وه.
امریکا او اروپايي ټولنې اوس د کوسوو پر چارواکو نیوکه کړې چې ګواکې د دغه هېواد شمال کې یې وضعیت بې ثباته کړی دی.
دوی د داسې کړنو د ناوړه پایلو خبرداری هم وکړی چې په دې سیمه کې د توکمیز کړکېچ اور بلولی شي.
کوسوو په ۲۰۰۸ کال کې له صربیا خپلواکي اعلان کړه.
تر هغې ور وړاندې کلونو کې یې د صرب او البانیايي توکمو وګړو ترمنځ اړېکې ترینګلې وې.
امریکا او سترو اروپايي هېوادونو د کوسوو خپلواکي په رسمیت پېژندلې خو د روسیې له ملاتړه برخمنه صربیا او پخپله کوسوو کې مېشت صربان ترې انکار کوي.
په ټوله کې د کوسوو د وګړو تر ۹۰ سلنې ډېر البانیایي توکمه دي، خو په شمال کې یې صربان اکثریت جوړوي.
ناټو وايي د دوشنبې ورځې تاوتریخوالي او اخ و ډب کې د ایټالیا او هنګري سوله ساتي ټپي شوي دي.
رپوټونو کې راغلي چې له سرتېرو ځینې د چاودېدونکو وسیلو له کبله سوځېدلي او درې پکې په مرمیو لګېدلي دي.
د دغه تاوتریخوالي په تړاو د پنځو کسانو د نیول کېدو خبر ورکړ شوی.
بلخوا د صربیا ولسمشر الکساندر ووچیچ ویلي، په دغه اخ و ډب کې لسګونه صربان هم ټپي شوي چې ۵۰ تنو ترې د روغتون درمنلې ته اړتیا موندلې.
د عکس سرچینه، Getty Images
ویل کېږي د صرب احتجاج کوونکو د قهرېدو یوازنی لامل دا نه و چې ولې یې په سیمه کې البانیايي توکمه ښاروالان ټاکل شوي، بلکې هلته پر وسلو او زغره والو ګاډو د کوسوو د سنبال پولیسو پراخ حضور هم پارولي دي.
د دغو ځواکونو لخوا د ځايي ښاروالیو له ودانیو د صربیا بیرغونو کښته کېدو او پر ځای یې د کوسوو د بیرغونو راځړولو هم غوسه زیاته کړې ده.
د کوسوو چارواکو ویلي دا ګام یوازې د دې لپاره اخیستل شوی چې په دیموکراتیکو لارو نوي ټاکل شوي ښاروالان په پرانیستي لاس کار وکړی شي.
خو د دوی دا وروستۍ کړنې ثبات ته زیان اړونکې بلل شوې.
ان امریکا او اروپايي ټولنې هم چې د کوسوو ملاتړ کوي، دغه وروستي ګامونه غندلي دي.
دوی د کوسوو پر حکومت غږ کړی چې د کړکېچ د کمېدو هڅه وکړي.
خو ځايي چارواکو تر اوسه په دې غوښتنه غوږ نه دی ږرولی.
