ډونلډ ټرمپ: "سملاسي مې محاکمه" کړئ

د امریکا ولسمشر ډونلډ ټرمپ په داسې مهال په مشرانو جرګه کې د خپلې استیضاح په هکله د سملاسي محاکمې غوښتنه کوي، چې ډیموکراټان او جمهوریپال د دې محاکمې د پیلېدو پر وخت بندون یا بنسبت ته رسېدلي دي.

د چارشنبې په ورځ ولسي جرګې ولسمشر ټرمپ د واک ناوړه کارولو او د دوی د کارونو په مخ کې د خنډ اچولو په تور استیضاح کړ.

خو اوس ډیموکراټان مشرانو جرګه کې د ولسمشر له محاکمې انکار کوي چې د جمهوریپالو په لاس کې ده

دوی استدلال کوي چې جمهوریپال سناتوران له شاهدانو ډډه کوي او مناسبه محاکمه به ونه شي.

* "ډونلډ ټرمپ د دېموکراسۍ لپاره ښکاره خطر دی"

* ډونلډ ټرمپ د محکمې لخوا دوه میلیون ډالره جرمانه شو

* بایډن: ډونلډ ټرمپ "ثابته کړه چې ګناهګار دی"

خو ښاغلي ټرمپ خپل ټوېټر کې لیکلي: د ولسمشر د نه وړتیا د طرحې تعقیبولو لپاره د ډیموکراټانو سندونه صفر دي یا هیڅ سند نه لري:

"وروسته له هغه چې ډیموکراټانو په کانګرس کې د روان چلن په هکله ماته قانوني حق را نه کړ. نه وکیلان، نه شاهدان هیڅ هم نه. اوس سنا ته دا ویل غواړي چې د محاکمې کار څنګه پرمخ بوځي. د یو څه ثابتولو شواهد یې صفر دي او هیڅکله به هم دې کار پسې نه شي، دوی د تېښتې لار لټوي. زه د خپل ځان سملاسي محاکمه غواړم".

د امریکا ولسي جرګې- چې ډیموکراټ ګوند پکې اکثریت دی- د پنجشنبې په ورځ په مصوبه کې ښاغلی ټرمپ له دوو تورونو سره مخ کړ؛ واک ناوړه کارول او د ولسي جرګې چارې خنډنۍ کول.

خو د ولسمشر د ګوند یا جمهوریپالو غړو رایه ور نه کړه.

ډیموکراټان وایي، ولسمشر ټرمپ د پوځي مرستو په بدل کې له اوکراین غوښتنه کړې وه چې د ده سیاسي سیال جو بایډن پر ضد د فساد قضیه پرانیځي.

جوبایډن د پخواني ولسمشر بارک اوباما مرستیال او راتلونکو ولسمشرۍ ټاکنو کې د ډونلډ ټرمپ ممکنه سیال دی.

ولسي جرګه دا هم وايي، ولسمشر ټرمپ د سپینې ماڼۍ کارمنان نه پرېښودل چې د دې مسلې په هکله څېړونکې کمېټه کې شهادت ور کړي او دا کار یې د کانګرس د قانونې دندې په مخ کې خنډ جوړول او جرم دی چې د ولسمشر د واک له منځه تلو سبب کېږي.

ولسمشر ټرمپ دا تورونه ردوي او ټینګار کوي چې ډیموکراټان د ده پر ضد دسیسې جوړوي او په دې توګه یې له واک لرې کول غواړي.

ولسمشر څنګه محاکمه کېږي؟

د امریکا د قانون له مخې د ولسمشر سرغړونو ته د رسېدګۍ بهیر او له هغه د واک سلبول په ولسي جرګه کې د طرحې تصویب سره پیلېږي.

چې دا طرح تصویب شي، د ولسي او مشرانو جرګو په ګډه غونډه کې پر موضوع غور کېږي.

دې ناسته کې د ولسي جرګې غړي د څارنوالانو رول لري او پر ولسمشر تورونه لګوي او خپل شواهد او سندونه وړاندې کوي.

د مشرانو جرګې غړي هم دې دوسیه کې د قاضیانو رول لري.

د دواړو جرګو د خبرو په پای کې مشرانو جرګه د ولسمشر د واک سلبولو لپاره رایه اچوي.

که له دریو درې برخې سناتوران ولسمشر بې صلاحیته وبولي، ناوړتیا ته یې رایه ور کوي او ولسمشر له واک ګوښه کېږي.

خو د ټرمپ جمهوریپال ګوند په مشرانو جرګه کې ډېرې څوکۍ لري او فکر نه کېږي چې د نوموړي پرضد رایه ور کړي.

د امریکا متحده ایالتونو تاریخ کې ډونلډ ټرمپ دریم ولسمشر دی چې له استیضاح سره مخ کېږي، تراوسه نور دوه دې محاکمه کې له واک لرې شوي نه دي.