ملګري ملتونه: حوثیان د یمن له دریو مهمو بندرونو وځي
د عکس سرچینه، EPA
ملګري ملتونه وايي يمن کې حوثي ياغيان پلان لري چې د شنبې په ورځ ( د مۍ ۱۱) له دريو مهمو بندرونو خپل وسله وال وباسي.
دا له هغه راهيسې يو لوى گام دى چې تير ډیسمبر کې د یمن ښکېلو غاړو پر اوربند هوکړه وکړه.
حوثیانو هم په ټوېټر کې د خپلو وسله والو د وتلو خبره منلې ده.
لا هم مالومه نه ده چې له دې سیمو د حوثیانو یو لوریز وتلو سره به د یمن دولتي ځواکونه هم ورته کار وکړي که نه.
د ملګرو ملتو د څاونکو او پلټونکو مشر جنرال مایکل لولسګرارډ-چې د هوکړې څارنه کوي- وايي حوثيان نيت لري چې سره له ننه له حديده ، سليف او راس عيسا بندرونو د خپلو ځواکونو په ايستلو لاس پورې کړي.
د دې بندرونو اهمیت
د عکس سرچینه، AFP
حدیده بندر د یمن تر ټولو لوی بندر دی، سلیف بندر هم د غنمو واردولو لپاره کارېږي او له راس عیسا هم تېل دغه هېواد ته لېږدول کېږي.
د ملګرو ملتونو یو ویاند وايي، دا بندرونه پر هغو میلیونونو یمنیانو د مرستې وېشلو لپاره مهم دي چې له لوږې رنځېږي.
له دې بندرونو د حوثیانو وتل یو لوریز دي، خو ور سره د یمن د کورنۍ جګړې د پای ته رسولو لپاره خبرې دوامداره کېږي، چې لسګونه زره کسان پکې وژل شوي دي.
