د 'سیلفي' مینه والې دوه ګورېلاوې
د عکس سرچینه، RANGER MATHIEU SHAMAVU
دوه ښځینه ګورېلا له خپل هغه ژغورونکي سره په یوه سیلفي کې ولاړ دي چې په کوچنیوالي کې یې دوی ژغورلې وې.
دا انځور د کانګو دیموکراتیک جمهوریت په ملي پارک ویرنګا کې اخیستل شوی.
د دغو ګورېلاوو مور او پلار د ناقانونه ښکاریانو له خوا وژل شوي وو، خو دوی په کوچنیتوب کې ژغورل شوې وې.
د دغه پارک مرستیال مشر انوسنټ مبورانوموي بي بي سي ته وویل، دواړو ګورېلاوو د ساتونکو چمونه زدکړي او داسې انګېري چې ګني دغه ساتونکي (انسانان) یې مور او پلار دي.
مبورانوموي وايي د دواړو ګورېلاوو مور او پلار د ۲۰۰۷ کال په جولای میاشت کې ووژل شول.
کله یې چې دغه بچۍ وموندل شوې، یوه یې د دوو میاشتو او بله د څلورو وه.
تر موندل کېدا وروسته سم لاسي د ویرونګا ملي پارک سینکویکوي پالنځي ته ولېږدول شوې او له هماغه راهیسې تر اوسه هلته اوسېږي.
مبورانوموي زیاتوي: "کله چې دوی له ژغورونکو ساتونکو سره اوسېدې، د ساتونکو چمتونه یې زد کړي او د انسان په څېر پر پښو نېغې ولاړې وي."
دی زیاتوي: "موږ به حیران وو چې دوی هم زوږ چمونه کوي، ورته خندل به مو."
تېر کال په دغه پارک کې پنځه ساتونکي د یاغیانو په یوه کمېن کې ووژل شول او له ۱۹۹۶ کال راهیسې په ویرونګا ملي پارک کې تر ۱۳۰ ډېر ساتونکي مړه شوي/وژل شوي دي.
د کانګو دیموکراتیک جمهوریت ختیځه برخه د حکومت پلوو او نورو وسله والو ډلو ترمنځ د شخړو شاهده ده.
ځینې دغه وسله والې ډلې د ویرونګا ملي پارک پر یوه برخه هم وکمن دي او هلته د حیواناتو ناقانونه ښکار کوي.
