د نړۍ یوه ډېر ګوښي هېواد کې د ژوند رنګونه

که څه هم ډونلډ ټرمپ او کیم جون اوون یوه بل ته د محو کولو ګواښونه کوي، خو شمالي کوریا کې د نور کله په څېر ژوند او چارې یې دوام لري.

دغه تصویرونه د شمالي کوریا خبري ټیم ستمبر کې د هېواد له بېلا بېلو برخو یو ځای کړي دي. تصویرونو کې د ورځني ژوند په چارو بوخت خلک لیدل کېږي.

د شمالي کوریا دغه اوسېدونکي ونسان ښار کې سیل ته وتلي دي. د دوی پر څېرو د امریکايي بندیزونو یا تاوتریخوالي کومه نښه نښانه نه لیدل کېږي.

دغو ماشومانو شوخ رنګه سپورتي کالي اغوستي دي او له لږ غور وروسته د دوی کالي د اډیډاس او نایکې په څېر د کالیو مشهورو لوېدیځو برانډونو تقلید معلومېږي او دغه ډېری ماشومان به ښايي له دغو برانډونو په اړه معلومات نه لري.

دغې کښتۍ کې به ځايي اوسېدونکو د جاپان نیګاتا بندر ته سفر کاوه. ۲۰۰۶ کال کې له بندیزونو وروسته د کښتۍ تګ راتګ په ټپه ودرېد، خو کارکوونکي یې لا هم خپلې چارې تر سره کوي.

سمندري خواړه یو مهال د شمالي کوریا له مهمو صادراتو بلل کېدل، خو اګست کې د ملګرو ملتونو له بندیزونو وروسته د سمندري خوړو صادرات په ټپه درېدلي دي او یوه برخه یې ځايي بازار ته وړاندې کېږي.

تر اوږدې مودې پورې له چین او جاپانه الیکترونیکي بایسکلونه واردیدل، چې پلازمېنه کې به تر سترګو کېدل، خو اوس کوچنیو ښارګوټو کې هم لیدل کېږي او له دې ښکاري چې ښايي له پیونګ یانګ نه بهر هم پرمختګ کېږي.

که یوه لور ته په ډېرو ښارونو کې د تګ راتګ لپاره له بایسکلونو کار اخیستل کېږي، نو بل لور ته د کباړ لېږدولو لپاره په هیم هنګ ښار کې غوايي ګاډۍ هم استعمالېږي. دغه کباړ له ریسایکل وروسته بېرته د کاروولو وړ جوړیږي.

له دې کسانو سره ناستې ښځې پر یوه پلاستیکي بېګ لاس ایښی، چې د چینايي او جاپاني ټیټې بیې برانډ مینیسو تولید دی. د تصویر اخیستونکې شمالي کوریا نیوز په رپوټ کې ویل شوي، دغې ادارې خپل لومړنی پلورنځی پسرلي کې پرانیستی و، خو د سختو بندیزونو له کبله یې نوم بدل کړ.

له بندیزونو وروسته یو شمېر پټرول اسټېشنونه تړل شوي دي او د برېښنا نشتوالي له کبله ځینې ځايي اوسېدونکو د لمریزې برېښنا کاروول پيل کړي دي.

له اقتصادي ستونزو سره هم پروپاګند کېږي. هر کال د بنسټ ورځې په نامه مراسم تر کېږي، پلازمېنه کې د نڅا او سندرو بانډارونه کېږي، دغه ځوانه ښځه دغو مراسمو کې ګډون ته چمتو ښکاري.

حکومت لار ښوونکي سیلانیان د جګړې اړوند موزیم ته بیايي. له تاوتریخوالي سره هم خندا او موسکا لیدل کېدای شي.

شمالي کوریا وايي هره شېبه جګړې ته چمتو دي. د یوې لویې لارې اوږدو کې دغه کانکریټي خنډونه د ټانکونو مخنیوي لپاره جوړ شوي دي. د دغو خنډونو بنسټونو کې بارووت ځای پر ځای شوي دي او د برید په صورت کې یې چاودنه د مخالف ځواک د ټانکونو مخنیوی کوي.

د بالسټیک توغندیو او اتومي ازموینو په اوسني دور کې دا په ظاهره د ټانکونو د جګړې یو پخوانی تکتیک معلومېږي، خو له رواني پلوه یو خبرداری بلل کېږي، چې هر مهال د جګړې احتمال یادوي.

ټول تصویرونه له شمالي کوریا نیوز نه اخیستل شوي دي، چې د شمالي کوریا په اړه یې د ځانګړې خپرونې برخه ده. له نړۍ دغه ګوښي هېواد کې د حکومتي ساتونکي له اجازې پرته تصویر نه شي اخیستل کېدای او دغه ساتونکي تل هلته لیدل کېږي.