اپل شرکت د چین پر ځای هند کې ایفون ۱۴ جوړوي

اپل شرکت ویلي، په چین کې د ایفون ۱۴ د جوړولو پر ځای یې اوس هند کې د ایفون ۱۴ جوړولو چارې پیل کړې دي.

دغه امریکایي شرکت وړاندې خپل ډېری ایفونونه چین کې جوړول، خو د واشنګټن او بیجېنګ ترمنځ د سیاسي ترینګلتیا له کبله یې د تولید خپله ډېره برخه له چینه ایستلې ده.‌

د چین د (صفر کوویډ) مشهوره تګلاره ددې لامل شوه چې هلته ډېری شرکتونه خپلې چارې ودروي.

اپل شرکت خپل ۱۴ ایفون روانه میاشت بازار ته راویوست.‌

دغه شرکت وايي: "په ایفون ۱۴ کې نوی تخنیک کارول شوی او امنیت یې تر پخوانیو هغو ډېر ټینګ شوی، موږ هند کې د ایفون ۱۴ جوړولو ته لېوال یو."

په ټایوان کې د (فوکسکان) شرکت چې د اپل ډېری موبایلونه جوړوي، له ۲۰۱۷ کال راهیسې د هند تامیل نادو ایالت کې یوه کارخونه لري او تر ټولو زاړه ماډل موبایلونه جوړوي.

خو اپل اوسمهال په هند کې د ایفون ۱۴ جوړولو له لارې لویې پانګونې ته زړه ښه کړی.

اپل دا هم په پام کې لري چې هند کې د سوېلي کوریا او چین جوړ موبایلونو د بازار ځای اپل ونیسي.

خو دا به په دې مانا نه وي چې د اپل تولید به په دې هېواد کې ارزانه وي.

که څه هم پر نوي جوړېدونکي ایفون به (هند کې جوړ شوی) نښان لګول کېږي، خو لا به هم هندیان د ایفون رانیولو لپاره ډېرې پیسې ورکوي.

د هند حکومت اته کاله مخکې د (هند کې جوړ) یو کمپاین پیل کړی و چې هدف یې پخپل هېواد کې د صادراتو او صنعت پراخه کول وو.

وړاندې د (جې بي مورګن) بانک کارپوهانو ویلي وو، تمه لري چې اپل به د روان کال په اوږدو کې خپل د ایفون پنځه سلنه تولید هند ته ولېږدوي.

او تر ۲۰۲۵ کال پورې به د ایفون څلورمه برخه تولید د سوېلي اسیا هېوادونو ته ولېږدوي.

د اپل د تولیداتو واردوونکي فوکسکون شرکت تېر کال ویتنام ته د شاوخوا ۱٫۵ میلیارد ډالرو توکي پانګونه کړې وه.‌