بهرته د ملالې د لېږد پرېکړه د هغې له مور او پلار سره له سلا مشورې وروسته وشوه.
د پاکستاني پوځ د رسنیز دفتر د مسوولینو په وینا، د ډاکټرانو له پرېکړې وروسته په سوات کې د وسله والو طالبانو په برید کې ټپي شوې ملاله یو سفزۍ د درملنې لپاره برتانیا ته لېږدول شوې ده.
د پاکستان د دولتي ټیلویزون په رپوټ کې ویل شوي، چې د ډاکټرانو بورډ د دوشنبې( اکتوبر۱۵) په ګهیځ دغه پرېکړه وکړه.
بل لور د برتانیا د بهرنیو چارو وزیر ویلیم هیګ ویلی، چې هېواد به یې د ملالې یوسفزۍ د درملنې لپاره ټولې اسانتیاووې چمتو کړي. د نوموړي په خبره د ملالې د درملنې لپاره د برمنګهم ( این ایچ ایس) روغتون ټاکل شوی دی.
د پاکستاني پوځ د رسنیز دفتر په خبره ملاله په هغه الوتکه کې برتیانیې ته یووړل شوه، چې د امبولانس اسانتیاوې هم لري او د عربي متحده اماراتو له خوا پاکستان ته استول شوې وه.
د پاکستاني ټیلویزیون په رپوټ کې د اهم ویل شوي، چې د ملالې د درملنې لګښت د پاکستان حکومت پر غاړه اخېستی.
"د درملنې لپاره بهر ته د لېږدولو لپاره همدا اوس مناسب وخت دی، چې د ملالې روغتیايي حالت په ښه کېدو دی او کولای شي سفروکړي."
ډاکټران
له رپوټ سره سم بهرته د ملالې د لېږد پرېکړه د هغې له مور او پلار سره له سلا مشورې وروسته وشوه.
ډاکټرانو ویلي، چې باید تر اوږدې مودې پورې د هغې درملنه وشي، چې بدني او ذهني ټپونه يې ورغیږي.
د ډاکټرانو په خبره، چې د درملنې لپاره بهر ته د لېږدولو لپاره همدا اوس مناسب وخت دی، چې د ملالې روغتیايي حالت په ښه کېدو دی او کولای شي سفروکړي.
د پاکستاني پوځي ډاکټرانو یوه ډله هم له ملالې سره یوځای ده.
له دې مخکې د یکشنبې په ورځ وویل شوو، چې د ملالې روغتیايي حالت د ډاډ وړ او په تدریجي ډول مخ په ښه کېدو دی.
ډاکټرانو د یکشنبې په ورځ دا هم وویل، چې د لږ ځنډ لپاره يي د مصنوعي تنفس اله هم له هغې نه لرې کړه او دا یوه بریالۍ تجربه وه.
