اجمل خټک له ١٩٧٣ کال وروسته افغانستان ته تللی او هلته يې کابو اتلس کاله تېر کړل .

اجمل خټک ډېر کلونه په افغانستان کې و او د پښتنو او بلوڅو د ازادۍ لپاره يې ډېرې هلې ځلې وکړې .

د افغانستان ولسمشر حامد کرزي د هغه د جنازې مراسمو ته يو دولتي هيات استولی و، او د ده کورنۍ ته يې د تسليت او خواخوږۍ مراتب استولي دي .

د افغانستان د اطلاعاتو او کلتور وزارت پخوانی وزير عبدالکريم خرم او يو شمېر نور ادبي او فرهنګي شخصيتونه په دې هيأت کې دي .

د دغه پلاوي يوه غړي نجيب منلي بي بي سي ته وويل : ((د افغانستان لخوا يو ډېر دروند پلاوی چې ښاغلي خرم يې مشري کوله، چې د ولسمشر سلاکار وزيران يوسف پښتون او سباوون هم پکې ول، اکوړي خټک ته ولاړو چې له بده مرغه تر جنازې وروسته ورسېدو . ))

نوموړی وايي چې د خلکو په وينا، هلته جنازې ته ډېر زيات خلک ورغلي وو، او جنازه په ډېر درناوي خاورو ته وسپارل شوه .

افغاني پلاوي د عوامي نېشنل ګوند له يوشمېر مشرانو او اکوړه خټک له قامي سپين روبو سره د زړه خواله وکړل او د افغان ولسمشر ورلېږلی پيغام يې وړاندې کړ .

ښاغلی منلی وايي چې اجمل خټک يوازې د هغه د کورنۍ نه، بلکې د ټولې پښتونخوا یو سياستوال او شاعر و .

اجمل خټک له ١٩٧٣ کال وروسته افغانستان ته تللی او هلته يې کابو اتلس کاله تېر کړل .

نوموړی تر هغه وروسته پاکستان ته ولاړ او د نړۍ د سياستونو د بدلون په پايله کې د ده په سياست کې هم بدلون راغی .

اجمل خټک د عوامي نېشنل ګوند له عنعنوي مشرې سره اختلاف راغی چې همدا يې له دې ګونده د جلاوالي لامل شو، خو خپله لاره يې بېله نه کړه .

اجمل خټک درې زامن او دوې لوڼې لري .