په ختيځ کونړ ولايت کې امريکايي پوځيان مېشت دي .

دغه چاودنه تېره ورځ (جمعه، د مۍ ٢٣، د غبرگولي دريمه) شوې ده .

د څوکۍ ولسوالۍ ځايي چارواکي وايي چې دغه چاودنه تېره ورځ ناوخته د پلار درې په سيمه کې شوې ده .

د چارواکو پروينا، په نښته کې د ايتلاف درې سرتېري او د هغوى يو تن افغان ژباړن ټپيان شوي دي .

بل خوا په بگرام کې ايتلافي ځواکونو بي بي سي ته په يوه رالېږلې خبرپاڼه کې ويلي چې په ياده شوې چاودنه د ايساف څلور سرتېري او يو ځايي اوسېدونکى ټپيان شوي دي .

د خبرپاڼې پروينا ټپيان نژدې روغتون ته د درملنې لپاره وړل شوي دي .

خو په سيمه کې ځايي طالبان بيا وايي چې ياده شوې چاودنه دوى کړې ده او د بهرنيو ځواکونو يو ټانک يې له منځه وړى او پکې سپاره سرتېري يې وژلي دي .

خو ايساف بيا په خپله خپره کړې خبرپاڼه کې ويلي چې په چاودنه کې هېڅ کوم سرتېرى نه دى وژل شوى .

د يادونې وړ ده چې په ختيځ کونړ ولايت کې امريکايي سرتېري مېشت دي .