ايساف وايي دا عمليات يې تيره پنجشنبې ترسره کړي خو خبر يې اوس خپروي

له کابل څخه د سه شنبې په ورځ ( د فبروري ٢٦ ) په خپره کړې يوه خبر پاڼه کې ايساف وايي دا کوکنار يې په بر سنگين کې د پوځي عملياتو په ترڅ کې د تيرې پنجشنبې په ورځ ونيول .

ايساف دا نه وايي چې ولې يې اوس دغه خبر خپور کړى دى . خو دا خبر په داسې وخت کې خپريږي چې دهلمند والي اسد الله وفا يو وار بيا پر نړيوالې ټولنې او د کورنيو چارو پر وزارت نيوکې کړي دي چې گواکې د گکوکنارو په ورانولو کې ورسره مرسته نه کوي .

ښاغلي وفا وويل چې دۀ د مخدره توکو د ختمولو لپاره درې ميليونه ډالر غوښتي و خو دۀ ته يوازې شل زره ډالر سپارل شوي و .

د ايساف خبر پاڼه زياتوي چې دوى د مخدره توکو د جوړولو دوه اسانتياوې هم قبضه کړي دي .

د خبر پاڼې په وينا له لوړ پوړو چارواکو سره تر خبرو وروسته پتېيل شوې ده چې دغه توکي ځاى پر ځاى ويجاړ کړي .

د ايساف ډگروال سايمن ميلر چې په هلمند کې د دغو ځواکونو وياند دى وايي :

(( ايساف د مخدره توکو او باغيانو ترمنځ ښکاره اړيکي ويني . دغه ډول جنايي چارې تاوتريخوالى زياتوي او اوږدوي . ))

هلمند په افغانستان کې د کوکنارو تر ټولو لوى توليدونکى ولايت دى .