د پوځ او ولس د مشرۍ دواړه څوکيو د نيولو لامله د جنرال مشرف پر ضد مخالفتونه په ډېرېدو دي

د واکمن مسلم ليگ گوند سرمنشي مشاهد حسين ويلي چې ښاغلى مشرف به د ولسمشرۍ له ټاکنو وروسته د پوځ مشرۍ پرېږدي.

جنرال مشرف غواړي د دويم ځل لپاره د راتلونکي اکتوبر په مياشت کې د ولسمشر په توگه د پارلمان لخوا وټاکل شي. په اکتوبر کې د پارلمان له لورې د ښاغلي مشرف د ټاکل کېدلو اعتبار پاى ته رسېږي، مخکې له دې چې په راتلونکي جنوري مياشت کې د ولسمشرۍ ټاکنې وشي.

ښاغلي حسين وويل: ''موږ تمه لرو چې جنرال مشرف به په راتلونکي مياشت کې له بيا ټاکل کېدو وروسته ان شاء الله د يوۀ ملکي ولسمشر په توگه خپل کار ته دوام ورکړي. ''

په همدې مهال کې د پاکستان ستره محکمه پر دې هم غور کوي چې ايا ښاغلى مشرف د پوځ د مشرۍ له ساتلو سره-سره د دويم ځل لپاره د ولسمشرۍ د ټاکنو لپاره دريداى شي او که نه.

د بېنظير بوټو په مشرۍ د هېواد تر ټولو لوى گوند د واک د شريکولو پر جوړجاړې له ولسمشر مشرف سره خبرې کوي او له لومړنيو شرايط څخه د پوځي له مشرتابه څخه د ښاغلي مشرف لاس اخيستل دي.

د ولسمشر او د پوځ د مشر په توگه د ښاغلي مشرف د پاتې کېدلو لامله چې د اساسي قانون له مخې د دواړو څوکيو اجازه ورکړل شوې، مخالفتونه هغونه مخ پر زياتېدو دي.

ستره محکمه هغه شپږ عريضې اوري چې پکې غوښتل شوي چې جنرال مشرف دې د ولسمشرۍ له کانديدۍ څخه بې صلاحيته کړل شي.