محمود کوچى له کابله

	د بي بي سي تعليمي پروژې د ښوونې وزارت ته تر ١٥٠٠٠٠ زيات ښوونيز کتابونه دپه وړيا توگه ورکړل

په همدې ترڅ کې نن (چارشنبه) د يادې شوې پروژې لخوا د يو نيم سل زرو نه زيات ښوونيز کتابونه د پوهنې وزارت ته په وړيا توگه ورکړل شول .

دغه کتابونه چې د چاپ په چارو يې شا وخوا يو سل او شپيته زره امريکايي ډالره لگېدلي د افغانستان لپاره د بي بي سي د ښوونيزو پروژو له خوا د ښوونې او روزنې وزارت ته وسپارل شول.

د بي بي سي تعليمي پروژو د نشرياتو ځانگړۍ پاڼه

د بي بي سي د تعليمي پروژې مشر شېراقا کريمي وايي چې دوى له ښوونې وزارت سره د ښوونکو په روزلو او نورو برخو کې هم مرستو ته چمتو دي .

ښاغلي کريمي زياته کړه :''زموږ هيله دا ده که چېرته د پوهنې وزارت موږ ته شين څراغ راکړي نو موږ به د دوى د تعليمي نصاب کتابونه د راډيويي پروگرامونو په بڼه واړوو او د دې تر څنگ موږ چمتو يو چې يو شمير هغه ښوونکي چې د عصري زده کړو نه بې برخې پاتې دي هغوى هم وروزو.''

د دغو کتابونو د سپارلو پر مهال د ښوونې او روزنې وزارت مرستيال صديق پتمن د خوښۍ د څرگندولو تر څنگ وويل چې دغه کتابونه به د افغانستان ډيرو لېرو پرتو سيمو ته وليږي او زده کوونکي به ترېنه گټه پورته کړي.

''زموږ هيله دا ده که چېرته د پوهنې وزارت موږ ته شين څراغ راکړي نو موږ به د دوى د تعليمي نصاب کتابونه د راډيويي پروگرامونو په بڼه واړوو او د دې تر څنگ موږ چمتو يو چې يو شمير هغه ښوونکي چې د عصري زده کړو نه بې برخې پاتې دي هغوى هم وروزو د بي بي سي د تعليمي پروژو مشر، شېراقا کريمي

شير اقا کريمي وويل : ''موږ لومړى د بي بي سي د تعليمي پروژې کتابونه يووړل او د پوهنې کارپوهانو له نظره مو تير کړل.

هغوى سل په سلو کې دغه کتابونه د ماشومانو لپاره گټور وبلل او موږ به دغه کتابونه د افغانستان ډيرو لرو پرتو کليو بانډو ته هم وليږو. د دغو کتابونو ستره ځانگړنه دا ده چې د هيواد په دواړو ژبو ليکل شوي دي.''

د بي بي سي ښوونيزې پروژې تر دې وړاندې هم څه د پاسه اتيا زره ټوکه کتابونه د افغانستان د ښوونې او روزنې وزارت ته په وړيا توگه ورکړي وو .

د ښوونې وزارت ته نوي سپارل شوي کتابونه تر ډېره پخپله منځپانگه کې روزنيزې او انځوريزې کيسې لري .

د بي بي سي تعليمي پروژې څوارلس کاله وړاندې په پيښور کې په کار پيل وکړ چې له هماغه مهاله د 'نوي کور نوي ژوند' تعليمي ډرامه خپروي چې تر اوسه يې د دوه زرو نه زياتې برخې يې خپرې شوې دي .

د همدغو ډرامو د لړۍ د کارتوني مجلو تر څنگ يې د ماشومانو لپاره اوه ديرش کيسه ييز کتابونه هم په پښتو او دري ژبو خپاره کړي دي.