بي بي سي پښتو ويبپاڼه له کابله

	دامريکا د هوايې بريد په ترڅ کې ٧ تنه افغان پوليسان وژل شوي او پنځه تنه نور ټپيان شوي دي

پنځه نور پوليس ټپيان شوي هم دي.

د ننگرهار والي، گل اغا شېرزي، د پېښې لامل ناسم پوهاوى او په سيمه کې د پوځي عملياتو پر مهال د همغږي نشتوالى بللى.

د امريکا په مشرۍ د نړيوال ايتلاف ځواکونه وايي چې سرتيري يي له داسې ناڅرگندو وسله والو کسانو سره په جگړه کې کېوتي چې لا هم نه دي پيژندل شوي.

پېښه تېره شپه ناوخته د ننگرهار ولايت د خوگياڼيو ولسوالي کې شوې او د پېښې ځاى تورې بوړې ته نژدې ښوول شوى.

په ننگرهار کې د چټک غبرگون د ځواکونو قومندان نصير احمد ساپي بي بي سي ته وويل چې امريکايي ځواکونو په تياره کې ددوى پر امنيتي پوستې ډزې وکړې .

هغه وويل، دواړه غاړې امريکايان او افغان پوليسو پر يو بل د طالبانو گومان وکړ او امريکايي پوځ بيا د هوايي مرستې غوښتنه وکړه .

ښاغلي ساپي وويل ، امريکايي الوتکو د دوى پر پوستې بمونه وغورځول چې په ترڅ کې يې اوه تنه پوليس ووژل شول او پنځه نور ټپيان شول .

په کابل کې د امريکا په مشرۍ ځواکونه چې د حکومت مخالفو وسله والو په وړاندې جنگيږي بيا د پېښې په اړه بل څه وايي.

ددوى وياند بي بي سي ته وويل چې افغان او امريکايي ځواکونو په گډه سره د مشکوکو وسله والو طالبانو د يوۀ پټنځاى د لټون لپاره پوځي عمليات کول چې د راکټي او لاسي بمونو او د سپکو وسلو بريد پرې وشو .

وياند وايي ددوى د گزمې ډلې ځوابي ډزې وکړې او د هوايي ځواکونو مرسته يې وغوښتله .

د امريکايي پوځ وياند وايي له پېښې وروسته دوى د 'بريد کوونکو' د پېژندنې په اړه پلټنه پيل کړې.

خو دۀ د مرگ ژوبلې په اړه څه ونه ويل او زياته يې کړه چې دا مهال نور جزيات نه لري .

بله خوا وسله وال طالبان ادعا کوي چې تېره شپه په خوگياڼيو کې دوى هم د پوليسو پر يوه پوسته بريد کړى او ١٢ تنه پوليسان يې وژلي. د طالبانو يوۀ وياند وويل د دوى په بريد کې يو شمېر نور پوليس ټپيان شوي دي او د هغوى څو گاډي يې هم له منځه وړي.

خو حکومتي چارواکو د دغې خبرې پخلى نه دى کړى.