ښاغلي اتمر په راتلونکي کال کې د افغانستان په ټولو ولايتونو کې د دارالمعلمين ، ديني مدرسو او مسلکي ليسو د جوړولو خبر هم ورکړ

په افغانستان کې د داسې ښوونکو شميره لږ ده چې لوړې زدکړې لري ، ډير د دې علت د معاشونو کمښت ښيي .

په افغانستان کې د ښوونکو معاشونه د ډيرو په گومان خورا لږ دي . د چارواکو په وينا هغو ښوونکو چې لوړې زدکړې يې لرلې تر اوسه پورې د مياشتې تر ١٠٠ ډالرو لږه تنخواه اخيسته .

دغه رپوټ ددې ځائ په کېکاږلو اوريدلې شئ

حال دا چې په نادولتي موسساتو کې د ډيرو کسانو مياشتنى عايد تر دې څو ځله ډير دى . د همدې له امله د معارف وزارت د داسې کسانو په جذبولو کې پاتې راغلى چې لوړې زدکړې لري .

د افغانستان د ښوونې او روزنې وزارت همدې ستونزې ته په پام سره اوس غواړي چې د دغه ډول ښوونکو معاشونه ان يو په درې ډير کړي . د ښوونې او روزنې وزير حنيف اتمر د يوۀ خبري کانفرانس په ترڅ کې د دغه نوي گام سپيناوى داسې وکړ.

ښاغلي اتمر په راتلونکي کال کې د افغانستان په ټولو ولايتونو کې د دارالمعلمين ، ديني مدرسو او مسلکي ليسو د جوړولو خبر هم ورکړ .

د دې تر څنگ د ښوونې وزارت چارواکو د افغانستان په ٩ ولايتونو کې د ٣٦ ښوونځيو د جوړولو تړون له شخصي ساختماني شرکتونو سره لاسليک کړ . د چارواکو په وينا د دغو ښوونځيو د جوړولو کار به د نوي کال تر پايه بشپړ شي.