خپلواک ساپى کابل

	دا په يقيني توگه ناممکنه خبره ده چې گواکې ملا عمر او يا د طالبانو نور ترهگر اړخونه دې بيرته راوستل شي

((دا په يقيني توگه ناممکنه خبره ده چې گواکې ملا عمر او يا د طالبانو نور ترهگر اړخونه دې بيرته راوستل شي. خو دا هم په يقيني توگه يوه اړتيا ده چې د سولې د غښتلتيا او پخلاينې د بهير پراخيدو ته پوره پوره پام واړول شي)).

ځانگړي استازي تام کونيکس د ځينو شنونکو دا انگيرنې هم ناسمې وبللې چې وايي کيدى شي د منځني ختيځ روانه کشاله له افغانستان نه د ملگرو ملتونو او نړيوالې ټولنې پام بل لور ته واړوي . ده وويل ملگري ملتونه به کله هم افغانستان ته شا نکړي او دا چې دلته به د حالاتو د سمون لپاره ټول هغه څه کوي چې په وس کې يې دي.

ښاغلي کونيکس په ټوله کې د افغانستان وروستۍ ناکرارۍ او په ځانگړې توگه په سويل کې د تاو تريخوالي پراخيدونکې کچه د انديښنې وړ وبلله . ده دا انگيرنې هم ناسمې وبللې چې وايي طالبان گواکې تر ډيره ځپل شوي او د مقابلې وړتيا يې په کميدو ده.
ښاغلي کونيکس د کوم هيواد له نومولو پرته داسې اشارې هم ورکړې چې مخالفان گواکې د افغانستان له پولو بهر سمباليږي.

د افغانستان لپاره د ملگرو ملتونو د سازمان د سرمنشي ځانگړي استازي، د هيواد په سويل کې د تاو تريخوالي ډيريده د اپينو له کاروبار سره هم تړلي وبلل. بيلگه يې د هلمند راوړه، چې د ده په وينا هم جگړې ډيرې دي او هم د اپينو کروندې.
ښاغلي کونيکس په لويه کې د نيشه يي توکو د مقابلې اوسنۍ تگلاره ناکامه وبلله او په هغې کې يې د څه جزيياتو له ورکړې پرته د بدلون د راوستو اړتيا مخې ته کړه.

له دې ټولو سره سره د ښاغلي کونيکس ټينگار په دې وو چې نړيواله ټولنه به د دغو ستونزو په اوارولو کې تر هغې له افغانستان سره مرسته او ملاتړ کوي چې دده په وينا اړتيا يې احساسيږي.

دا ډول ښاغلي کونيکس دا ټينگار هم کاوه چې يوازې پوځي مقابله د ستونزو د حل لاره نه ده. وړانديز يې دا وو چې نړيواله ټولنه بايد په ناکراره سيمو کې د بيا رغاونې له بهير سره د مالي مرستو په اندازه کې د پام وړ زياتوالى راولي.