د پنجشنبې سهار راهېسې اسرائيلو په لبنان کې ٨٠ بريدونه کړي دي

د پنجشنبې د سهار راهېسې اسرائيلو په لبنان کې ٨٠ بريدونه کړي دي. د اسرائيلو د پوځ يوى وياندۍ وويل چې لږ تر لږه په يوه پيښه کې حزب الله د اسرائيل په يوۀ ټانک د ماين بريد کړى او دوه اسرائيلي پوځيان ټپيان شوي دي.

اسرائيل وايي د دوى جنگي الوتکو تيره شپه په جنوبي لبنان کې د حزب ا لله په يو پناه ځاى بريد وکړ چې د دوى په گمان د حزب الله لوړ پوړو اورپکو ترې کار اخيست خو حزب الله وايي د دوى مشرانو ته هيڅ زيان نه دى رسيدلى.

پرون حزب الله پر اسرائيلو ١٥٠ توغندي ويشتلي وو چې دوه کوچنيان يې ووژل خو د ډيري مرگ ژوبلې ترڅنگ د اوربند امکانات نه ښکاري.

د لبنان لپاره د ملگرو ملتونو يوۀ چارواکي ويلي دي چې بشرې وضع خرابيږي او د بيړنيو مرستو چارواکو وويل چې نه حزب الله او نه اسرائيل د ملکي خلکو کړاوونو ته پام کوي.

بل خوا له لبنان څخه د بهرنيانو د وتلو بهير روان دى.

په کور دننه ملکي خلک د هغو سيمو څخه تښتي چې د اسرائيلو د بريدونو د خطر سره مخامخ دي .