خپلواک ساپى له کابله

	دا دويمه پرله پسې ورځ ده چې په کابل کې چاودنې کيږي .

درې واړه چاودنو چې د ښار په بيلابيلو برخو کې له يوه بل سره د وخت په لږ توپير تر سره شوې ، يو تن وژلى او په لسگونو نور يې زوبل کړي دي .

تر دې وروستيو چاودنو يوه ورځ وړاندې هم په دغه ښار کې دوو نورو پرله پسې چاودنو د دوو پوليسو په گډون شپږ تنه ژوبل کړي وو .

گهيځ مهال د ښار شمال پلو په خيرخانه ، د ښار په منځنۍ برخه اسمايي واټ ، او د ښار ختيځ پلو په پل چرخي کې دغه درې پرله پسې چاودنې په داسې وخت کې رامينځ ته شوې چې حکومتي ماموران او د پوځ او پوليسو افسران په گاډو کې د خپلو دندو په لور له واټونو تيريدل . بريدونه هم ظاهرآ پر همدغو گاډو تر سره شوي . امنيتي چارواکو دغه درې واړه چاودنې د سړک د غاړې بمي بريدونه ښودلي .

لومړنۍ چاودنه د ښار په مينځ کې د اسمايي پر واټ په ځايي وخت د گهيځ په اوه بجو او ١٥ دقيقو وشوه .

د دغه بمي بريد هدف د ملي پوځ د افسرانو د سپرلۍ بس وو . د دفاع وزارت له لورې خپره شوې اعلاميه وايي چې چاودنې څوک ندي وژلي خو د پوځ ٣٩ منسوبان يې ژوبل کړي دي .

د پوځ د دغو منسوبانو روغتيايي حالت د ډاډ وړ ښودل شوى او دا چې اوس يې په يوه پوځي روغتون کې درملنه کيږي .

د دفاع وزارت همدغه اعلاميه وايي چې د چاودنې په پايله کې بس له کنټروله ووت او د غاز و له يوې هټۍ سره ولگيد او اور يې واخيست .

عيني شاهدان هم د هټۍ او موټر دواړو د سوځيدو خبره کوي . ډير گمان دادى چې اکثره ټپيان په بس کې د اور لگيدو په پايله کې سوځيدلي دي . د پيښې يو عيني شاهد همدې ته گوته نيسي .

(( چاودنه په دې کراچۍ کې وشوه . پارچي پر هر لور خورې شوې . د موټر په ټانکۍ هم ولگيدې چې له کبله يې موټر اور واخيست . وروسته موټروان ځان له سيټه وغورځاوه . موټر همداسې په خپل سر ولاړ او دوکانونو هم ورسره اور واخيست . موږ څو تنه وليدل چې کليو يې اور اخيستى وو او له موټره يې ځانونه راوغورځول . وروسته امبولانسونه راغلل او ټپيان يې وليږدول . د اور د وژلو لپاره د اطفايې موټرونه هم راغلل . ))

د کابل دجنايي پوليسو مشر بي بي سي ته وويل چې بم دتازه ميوو په يوه کراچۍ کې ايښودل شوى وو او ډير گمان دا دى چې د بس له رسيدو سره جوخت د ريموټ کنټرول پواسطه چول شوى دى .

پخپله د دفاع وزارت اعلاميه هم دا يوه ريموټ کنټرول بمي چاودنه بولي .

دوهمه چاودنه د خيرخانې د لب جر د سيمې وه چې له لومړۍ چاودنې ١٥ دقيقې وروسته وشوه . دغه بريد د سوداگرۍ وزارت د مامورانو د سپرلۍ په بس تر سره شو .

د ښار د جنايي پوليسو مشر جنرال پکتيا وال د چاودنې په پايله کې د يوه تن د وژل کيدو او نورو څلورو کسانو د ژوبلې پخلى وکړ .

ښاغلي پکتيا وال وويل چې دغه بم هم د سړک پر غاړه په يوه کراچۍ کې ايښودل شوى وو .

د پيښې يو عيني شاهد چې په دغه بس کې سپور وو او د چاودنې د لمبو له کبله يې د سر ويښتان هم سوي وو وايي چې چاودنې پنځه کسان ژوبل کړل .

	چاودنې په داسې سيمې کې شوي دي چې گڼه گوڼه پکې ډيره وي

دريمه چاودنه د ښار ختيځ پلو د کابل جلال اباد پر لويه لاره وشوه . په دغه سيمه کې د ملي پوځ بارکونه پراته دي او پوځي گاډي پرې ډير تگ راتگ کوي .

دغه چاودنه هم د سړک د غاړې بمي بريد ښودل کيږي . خو د نورو دوو چاودنو خلاف يې مرگ ژوبله نه درلوده او يوازې د سړک پر غاړه يې کنده جوړه کړې ده .

د سې شنبې په ورځ هم په دې ښار کې ورته دوه بمي چاودنې وشوې چې شپږ کسان يې ژوبل کړل .

په دې کې دوه د پوليسو افسران وو . دغه چاودنې په داسې حال کې کيږي چې له څو ورځو راهيسې په ټول ښار کې د ملي پوځ او پوليسوتوندې گزمې او تالاشۍ روانې دي .