ميرويس افغان له کندهاره

	د زابل په ولايت کې پر لويې لارې ډير کله بريدونه شوي دي

د چارواكو په وينا نيول شويو كسانو هڅه كوله چې په كندهار كې ځانمرګي بريدونه ترسره كړي .

دغه كسان د پنجشنبې په سهار ( د چنگاښ ٨ د جون ٢٩ ) د زابل په لويديځه ولسوالۍ شهرصفا كې په يوه ټكسي موټر كېد چارواکو په وينا په داسې حال كې ونيول شول چې له زابل څخه د كندهار پرلور روان وو.

دشهرصفا ولسوالۍ د امنيې قومندان محمد رسول اكا بي بي سي ته وويل چې نيول شويو كسانو دوى ته منلي دي چې ګواكې د يوې ٢٠ كسيزې ډلې په بڼه د زابل ولايت ته راغلي او د دغه هيواد په بيلابيلو ولايتونو كې ځانمرګي بريدونه كوي .

نيول شوي دواړه كسان دګاونډي هيواد پاكستان د بلوچستان ايالت د بولان سيمې اوسيدونكي بلل شوي دي.

ښاغلي اكا پرنړيوالو او ځايي رسنيو غږ وكړ چې په شهرصفا ولسوالۍ كې دې له نيول شويو كسانو سره خبري وكړي .

چارواكي وايي چې نيول شوي كسان په ډاډه زړۀ خبري كوي او پر دې پښيمانه نه دي چې د ځانمرګو بريدونو د ترسره كولو په موخه افغانستان ته راغلي دي.

د دغو كسانو د نيول كيدو خبر وروسته له هغه د زابل چارواكو وركړ چې په زابل ولايت كې تيره ورځ يو ځانمرګى بريد ترسره شو.

كه څه هم له هغه بريد څخه د چارواكو په وينا امريكايي ځواكونه روغ رمټ ووتل خو په يوه بله چاودنه كې نړيوالې ټلوالې په همدغه ولايت كې د دوه امريكايي سرتيرو د ټپي كيدو خبر وركړ.

د ټپي شويو سرتيريو درملنه امريکايي ځواکونه کوي روغتيايي حالات يې د ډاډ وړ بلل كيږي .