ارش پاکطين له کابله

	ولسمشر کرزى به پر سوداگريزو او اقتصادي اړيکو له ايران او قطر سره خبرې کوي

افغان چارواکي وايي د دغه سفر په ترڅ کې به دواړه هيوادونه پر اقتصادي او سوداگريزو اړيکو هم وغږيږي . د ايران له سفره وروسته به افغان پلاوى قطر ته سفر کوي .

ولسمشر حامد کرزى ايران او قطر ته ايله څو ورځې تر هغه وروسته ځي چې د متحدو عربو اماراتو له سفره راستون شو .

افغان دولت وايي د سفر اصلي هدف د افغانستان د بهرني سياست پر هغۀ لومړيتوب ټينگار دى چې له اسلامي هيوادونو سره يې اړيکو ته ورکوي .

په دغه درې ورځني سفر کې د ولسمشر کرزي ملگرتيا د کابينې يو شمير وزيران او د دۀ سلاکاران کوي . لومړى پړاو ايران دى .

د ايران په دوه ورځني سفر کې به له ولسمشر حامد کرزي سره د بهرنيو چارو وزير ډاکټر سپنتا، د برېښنا او انرژۍ وزير اسماعيل خان ، لوى وزير هدايت امين ارسلا او يو شمير نور وزيران او سلاکاران ملۀ وي .

افغان چارواکي وايي کابل له تهران سره د ښو سياسي او اقتصادي اړيکو غوښتونکى دى .

تهران ته د سفر په ترڅ کې به ولسمشر کرزى له خپل ايراني سيال محمود احمدي نژاد او نورو لوړ پوړو ايراني چارواکو سره ويني .

تمه ده چې دواړه هيوادونه پر دوه اړخيزو اړيکو خبرې وکړي . افغان چارواکي وايي د دغه سفر پر وخت به د ايران او افغانستان تر منځ د اقتصادي او سوداگريزو اړيکو پر زياتولو ټينگار کيږي .

تمه ده چې د ايران له مشهد څخه د افغانستان د هرات تر ښاره پورې د اورگاډي د پټلۍ پر غځولو هم غور وشي .

افغان چارواکي د واشنگټن او تهران تر منځ د اړيکو ښه کيدل د سيمې په گټه بولي خو په دې برخه کې يوازې هغه وخت د دوى په وينا د کوم رول لوبولو ته چمتو دي چې ورڅخه غوښتنه وشي .

د ولسمشر کرزي د سفر دويم پړاو قطر ته دى . دغه سفر د قطر د امير په غوښتنه او بلنه کيږي .

په کابل کې چارواکي ټينگار کوي چې له اسلامي هيوادونو سره ښو اړيکو ته لومړيتوب ورکوي . په قطر کې هم د افغان چارواکو په وينا د سياسي او اقتصادي اړيکو د غوړولو تکل کيدونکى دى .