خپلواک ساپى له کابله

	ولسمشر حامد کرزي ته نژدې چارواکي ، متحده عربي اماراتو ته د دوشنبې په ورځ پيليدونکى دغه سفرد هغې تگلارې يوه برخه بولي چې د افغانستان دولت له اسلامي هيوادو او په دغه لړ کې له عربي هيوادونو سره د خپل منځي اړيکو د لازياتې ودې لپاره مخې ته کړې ده .

په دغه دوه ورځيني سفر کې به له ښاغلي کرزي سره د حکومت يو شمير وزيران او نور لوړ پوړي حکومتي چارواکي ملگري وي .

د سفر موخه د دواړو هيوادونو تر مينځ د متقابلو اړيکو او همکاريو لا زياته وده ښودل کيږي .په کابل کې زموږ همکار خپلواک ساپى دغه سفر ته داسې کتنه کوي .

ولسمشر حامد کرزي ته نژدې چارواکي ، متحده عربي اماراتو ته د دوشنبې په ورځ پيليدونکى دغه سفرد هغې تگلارې يوه برخه بولي چې د افغانستان دولت له اسلامي هيوادو او په دغه لړ کې له عربي هيوادونو سره د خپل منځي اړيکو د لازياتې ودې لپاره مخې ته کړې ده .

ښاغلى کرزى او ورسره پلاوى به په همدې موخه د متحده عربي اماراتو له امير شيخ خليفه بن زيد آل نحيان او د امارت له نورو چارواکو سره خبرې وکړي .

افغانستان اوس مهال له دوو اړخو د دغو اړيکو د لازياتې ودې اړتيا احساسوي .

يو د هغه څه په اړه د گډو تگلارو غوره کول دي چې د ترهگرۍ خلاف جگړه بلل کيږي .

افغان چارواکي دا گڼې چې ترهگري يوازې د افغانستان لپاره نه بلکه د سيمې ، ټولو اسلامي هيوادونو او ټولې نړۍ لپاره گډ گواښ دى او دا چې د اسلام په اړه د يوه مناسب انځور وړاندې کول هم د ټولو واسلامي هيوادونو گډه دنده بلل کيږي .

دا ډول افغانستان د درې لسيزو له کړکيچ وروسته د بيا رغوونې په ډگر کې دټولې نړۍ او په دغه کتار کې د شتمنو عربي هيوادونو مرستې ته اړ دى .

افغان چارواکي تمه کوي چې ښايي د دواړو هيوادونو د مشرانو تر مينځ د خبرو اترو په پايله کې متحده عربي امارات په پلازمينه کابل کې د بيارغوونې د يو لړ پروژو ذمه واري په غاړه واخلي .

په دې کې په ځانگړې توگه د ښار د واټونو او سړکونو د بيا رغوونې او دښار له مينځه د تير شوي سين د پاکولو خبره کيږي .

دا دواړه پروژې دکلونو په اوږدو کې د رامينځ ته شوې ويجاړتيا له اړخه د پام وړ لگښت غواړي چې اوس مهال د افغانستان د دولت په وس کې نشته .

په دې سربيره افغان چارواکي له متحده عربې اماراتونه د ديني مدرسو د جوړولو په برخه کې هم د مرستو تمه کوي .

انگيرنه دا ده چې په دې سره به بهر ته د ديني زده کړو لپاره د تلو او دچارواکو په ويناد ترهگرو په لومه کې د کمکي او ځوان کول د لويدو مخه ونيول شي .

د سوداگرۍ وده او په افغانستان کې پانگونې ته د متحده عربي اماراتو د پانگه والو هڅول ددغه سفر يوه بله لويه موخه ښودل کيږي .

ولسمشر کرزى له دغه هيواد نه تر راستنيدو وروسته ايران ته هم د سفر نيت لري .

چارواکي دا گڼي چې يوه اونۍ وروسته په تر سره کيدونکي دغه سفر کې به له ايران سره هم ځينې موافقې لاسليک شي .

په دې کې له دغه هيواد نه لويديځ ښار هرات ته د اورگاډي د پټلۍ غزول ، د يوه بل په هيواد کې د متقابلې پانگونې د هڅولو ، يو بل ته د مجرمانو د سپارلو ، د بنديانو د پريښودلو او داسې نورو يادونه کيږي .