دا د افغانستان دويمه پرله پسې لوبه وه چې مساوي ختمه شوه

دا دويمه پرله پسې لوبه ده چې د اسيا فوټبال کانفدراسيون په ننگونکي کپ يا چيلنج کپ کې يې افغانستان مساوي پاى ته رسوي .

په دې توگه افغان لوبغاړو په درو لوبو کې يوه بايللې او دوه مساوي کړي چې دا دويم پړاو ته د دوى ته وړاندې تگ لپاره بس نه دي .

په دغۀ کپ کې ټول ١٦ هيوادونه برخه لري چې په څلورو گروپونو سره وېشل شوي دي.

افغانستان په الف ګروپ کې دى او ورسره په دغه ګروپ کې هندوستان، تايوان او فليپاين يو ځاى شوي دي .

د افغانستان له گروپ څخه هند او تايوان منځلوبو يا کواټر فاينل ته رسيدلي دي .

افغان لوبغاړو دوه ورځې وړاندې له تايوان سره هم لوبه مساوي ختمه کړې وه .

افغانستان په خپلې لومړنۍ لوبې کې دوري په ١١د اپريل په ١ نېټه له هندوستان سره ښه لوبه ونه کړاى شوه .

هغه لوبه افغانستان د لوبې په لومړي پړاو کې د دوو گولونو په خوړلو وبايلله خو په دويم پړاو کې افغان لوبغاړو دوه اسانه موقعې له لاسه ورکړې که نه نو هغه لوبه هم مساوي ختميدلاى شواى .

دا دويمې پرله پسې نړيوالې لوبې دي چې افغان لوبغاړي پکې ښه پيل نه کوي خو وروسته وروسته پکې ځليږي .

تير کال په کراچۍ کې د سويلي اسيا د فوټبال په اتلوليو کې هم افغانستان خپله لومړنۍ لوبه وبايلله خو وروسته يې بيا د دغو اتلوليو پخواني اتل سرېلنکا ته ٢-١ ماتې ورکړه .

تېر ځل ځينو افغان لوبغاړو شکايت لارۀ چې له افغانستان څخه کراچۍ ته له ورتگه سم لاسي وروسته لوبغالي ته بلل شوي وو او لوبه يې کړې وه .