حنان حبيبزى له مزار شريف څخه

	يونس قانوني وايي داسې رپوټونه لري چې د افغان استازو د وژنې دسيسه په پاکستان کې جوړيږي .

د تخار ولايت د پوليسو مشر جنرال محمد زمان مموزي د دغې پيښې خبر وركړ او زياته يې كړه چې نا پيژندل شوي وسله وال كسان د سيد صادق اغا پر كور ور ننوتلي دي او پر نوموړي يې وسله وال بريد كړى چې د ډزو په ترڅ كې ټپي او څو شيبې وروسته يې ساه وركړې ده .

كه څه هم د پيښې په اړه چارواكو زيات جزيات ور نه كړل خو ويې ويل چې د پيښې په سيمه كې پوليسو پلټنې پيل كړي دي چې وژونكي پيدا كړي .

تر اوسه پورې كومې ډلې يا شخص ددغه بريد پړه په غاړه نه ده اخيستې .

خو چارواكو دا د افغانستان د دښمنانو كار وباله .
د نا پيژندل شؤ وسله والو كسانو له خوا د تخار د ولايتي جرګې د مشر وژنې په افغانستان كې د ورته ټولنو تر منځ امنيتي انديښنې زياتې كړي دي .

د افغانستان ملي جرګې وويل چې نژدې دوه اوونۍ وړاندې په كابل كې د مشرانو جرګې پر مشر صبغت الله مجددي بريد وشو او اوس د تخار د ولايتي جرګې د مشر وژنه ښيي چې د خلكو استازي د افغانستان د دښمنانو له لورې له ګواښ سره مخامخ دي .

د افغان پارلمان مشر محمد يونس قانوني په همدې تړاؤ وويل چې ده ته په ځانګړي ډول داسې راپورونه رارسيدلي دي چې په ګاونډي پاكستان كې د افغانانو د استازو په وړاندې ورته دسيسې د جوړيدو په حال كې دي .

خو دا يې ونه ويل چې دغه دسيسې د چا له خوا جوړيږي .

ده دغه پيښه وغندله او له امنيتي څانګو څخه يې وغوښتل چې بريد كونكي پيدا او قانون ته وسپاري .

ښاغلى صادق د تير ميلادي کال د اکتوبر له پارلماني ټاکنو څخه وړاندې د سيمه ييز قومندان په توګه د يو شمير پخوانيو مليشو مشري كوله .

ددغه وژل شوي پخواني ازبك توكمي قومندان كورنى د تخار ولايت له مركز تالقان څخه لسګونو كيلو مټره لرې د خوجه غار په ولسوالۍ كې اوسيږي .

تخار د افغانستان په شمال ختيځ كې داسې ولايت بلل كيږي چې امنيتي تاوتريخوالى په كې ډير كم دى خو چارواكي وايي چې ځينې وخت د همدې ولايت له لارې چې له ګاونډي تاجكستان سره پر پوله پروت دى ، د نشيي توكو قاچاق كونكي منځنۍ اسيا ته تګ راتګ كوي .

پوليس وايي هغه كسان چې نشيي توكي ددغه ولايت له لارې د منځنۍ اسيا بازارونو ته ليږدوي ، وسلې لري او كله نا كله د وسله والو نښتو د رامنځته كېدو لامل ګرځي .

د افغانستان د نورو ولايتونو په څير د تخار ولايتي جرګې غړي هم د تير ميلادي كال په اوږدو كې له پارلماني ټول ټاكنو سره جوخت د خلكو د رايو له لارې وټاكل شول .

په زياتره ولايتونو كې ددغو جرګه ګيو د غړو شكايت دادى چې چارواكي يې سلا مشورو ته سم غوږ نه ږدي .

د تخار د ولايتي جرګې مرستيال مولوي احمد الله احمدي له سيمه ييزو چارواكو ورته شكايت وكړ او وې ويل چې ددغه ولايت د جرګې د غړو د امنيت په اړه يې ددوى غوښتنې نه دي پلي كړي .

ښاغلى احمدي چې له دې پيښې څخه وروسته خبريالانو ته غږيده . په ترخه ژبه يې دولتي چارواكي پړ وبلل چې د ولايتي جرګو د غړو امنيت ورته هيڅ ارزښت نه لري .

خو چارواكو لا د جرګې د مرستيال ددغو څرګندونو په اړه څه نه دي ويلي .

دا په افغانستان كې د خپل ډول لومړنۍ پيښه ده .خو له دې دوه اوونۍ وړاندې په كابل كې د مشرانو جرګې پر ريس ځانمرګى بريد وشو چې روغرمټ ترې راووت خو څوتنو ملكي خلكو ته يې مرګ ژوبله واړوله .