د افغانستان کپتان ريس احمدزى او تکړه لوبغاړى دولت احمدزى په خپل بري حيرانه نه دي

د ميرليبورن کريکټ کلب چې د ايم سي سي په نامۀ مشهور دى د نړۍ يو له مخکښو کريکټ کلبونو څخه گڼل کيږي چې د دغې لوبې د خپرولو او د قوانينو په جوړولو کې لوى لاس لري .

د ايم سي سي په لوبډله کې د انگلستان ځينې تکړه لوبغاړي لکه پخوانى کپتان مايک گېټينگ هم لوبيدۀ چې له افغانستان سره په لوبه کې يې د ايم سي سي کپتاني کوله .

په دغه لوبه کې افغانستان په ټاکل شويو ٤٠ اوورونو کې ٣٦٠ مندې جوړې کړې .

دافغانستان له خوا محمد نبي په ٣٩ بالونو (توپونو) ١١٦ منډې وکړې چې ٧٢ منډې يې د شپږ منډو په مټ وې .،دغه راز کپتان رييس احمدزي او محمد ناصر ٥٦، ٥٦ او کريم صادق ٤٠ منډې جوړې کړې .

ايم سي سي ايله ١٧٢ منډې وکړې او ټول لوبغاړي يې وسوځيدل . دافغانستان له خوا هستي ګل څلور، دولت احمدزي ٢ ، ناصر او نبي يو يو لوبغاړي وسوځول .

د افغانستان ملي لوبډله د ايم سي سي په غوښتنه هندوستان ته تللى و . ايم سي سي له هغو هيوادونو سره تل لوبې کوي چې په کريکټ کې نوي غوړيدلي وي . سږ کال به ايم سي له چين ، بوتسوانا سره هم لوبې کوي .

د لوبو نور خبرونه د دې ځاى په کېکاږلو ترلاسه کړئ