د ايټاليا د معايناتو وروستۍ پايلې به د پنجشبې په ورځ خپريږي خو ډير باور همدا دى چې دغه والگى به د ايچ ٥ اين ١ ډوله وي

ايټاليا ته د معايناتو لپاره ليږل شوې هغې بېلگې چې د افغانستان له ناروغو مارغانو اخيستل شوې وې داسې ښيي چې ايچ ٥ ډوله والگى دى خو چارواکي اوس وايي چې ډير امکان دا دى چې دغه معاينات به ايچ ٥ اين ١ وايروس پکې وښيي .

د ويترنرۍ د څانگې يوۀ مامور خبري اژانسونو ته په کابل کې وويل :

(( دوى ( ايټالياييان ) وايي په سلو کې ٩٩ باوري دي چې ايچ ٥ اين ١ وايروس به وي خو لاا هم ځينې معاينات پاتې دي . ))

د افغانستان د روغتيا وزارت هم ويلي چې د ايټاليا د معايناتو وروستۍ پايلې به د پنجشبې په ورځ خپريږي خو ډير باور همدا دى چې دغه والگى به د ايچ ٥ اين ١ ډوله وي .

د افغانستان د ناروغو مارغانو بېلگې د پلازمېنې کابل له ځينو فارمونو او د ختيځ ولايت ننگرهار څخه اخيستل شوي دي .

ننگرهار د پاکستان په پوله پروت ولايت دى ، په پاکستان کې واردمخه د مارغانو د ايچ ٥ ناروغي موندل شوې ده .

ايچ ٥ اين ١ ډوله والگى له مارغانو برسيره انسانان هم وژني .

د مارغانو ايچ ٥ اين ١ ډوله والگي په نړۍ کې تر اوسه شاوخوا ١٠٠ کسان وژلي دي چې له تيرو دوو کلونو خپور شوى دى .