د اوس لپاره د افغانستان ډيرې سيمې د اينټرنيټ اسانتيا نه لري .

د افغانستان د مخابراتو وزارت د ولسواليو د اړيکو په نامۀ يوه پروژه پيل کړې چې د دوى په وينا ښه په چټکۍ فعاليت کوي او دا اوس اوس يې په پنځو نورو ولسواليو کې هم د تيلې فون ، فکس او اينټرنيټ اسانتياوې برابرې کړي دي .

په يوۀ خبري اعلاميه کې د مخابراتو وزارت وويل چې د ولسواليو د اړيکو د پروژې د تطبيق په لړ کې يې نن ( د کب ٦ د فبروري ٢٥ ) د کونړ ولايت په نور گل ولسوالۍ ، د وردگو ولايت په چک او سيد اباد ولسواليو او د پکتيا ولايت د ځاځيو په ولسوالۍ کې د تيلې فون ، فکس او اينټرنيټ اسانتياوې ورکړي دي .

د افغانستان د مخابراتو وزارت وايي د خپلې پروژې له بشپړيدو سره به د دغۀ هيواد هره ولسوالۍ د تيلې فون ٢٠ کرښې ولري چې دولتي ادارې او عام وگړي به ترې گټه اخيستى شي .

دوى نيت لري چې په هرې ولسوالۍ کې د اينټرنيټ اسانتيا لرونکي کمپيوټرونه هم کيږدي چې دولتي ادارې او عام وگړي ترې گټه واخلي .

په افغانستان کې د اينټرنيټ اسانتيا لږ او د کارونکو په وينا يې خورا گرانه ده .