په روان کال کې له پاکستانه ٦٠٠٠٠ افغان کډوال ستانۀ شوي دي .

د ملگرو ملتونو د کډوالو عالي کمشنري وايي دوى به لا هم له پاکستان څخه افغانستان ته له ستنيدونکو کډوالو سره مرستې کوي .

تيره اوونۍ ١٠٠٠ تنه افغان کډوال له پاکستانه خپل هيواد ته ستانۀ شول .

له دغو سره په روان کال کې د ستنو شويو کډوالو شميره ٦٠ زرو ته ورسيده .

د چارشنبه په ورځ په سلگونو افغان کډوالو د پاکستان په شمالي ښار پېښور کې د ملگرو ملتونو د کډوالو د عالي کمشنرۍ په يوۀ دفتر بريد وکړ او د دفتر ميز و څوکۍ او سامان الات يې ويجاړ کړل .

د ملگرو ملتونو دغې ادارې وړاندې ويل چې د کډوالو ستنيدنه د خپلې خوښې ده او له کډوالو سره به د هغوى له اړتيا سره سم مرسته کيږي چې بيرته په خپل ټاټوبي کې پر ځاى شي .

پاکستان په روان کال کې د افغان کډوالو بيلا بيل کمپونه وتړل او له کډوالو يې وغوښتل چې يا افغانستان ته ستانۀ شي او يا هم په ځينو نورو کمپونو کې دېره شي .

د اگست په مياشت کې د باجوړ او کرمې په ايجنسيو کې هم د کډوالو کمپونه وتړل شول .